ក្រសួងយុត្តិធម៌អាមេរិកបានប្រកាសថា ក្រុងវ៉ាស៊ីនតោនបានរឹបអូសយន្តហោះពិសេសរបស់ប្រធានាធិបតីវេណេស៊ុយអេឡាលោក Nicolas Maduro ពីបទរំលោភលើទណ្ឌកម្មរបស់សហរដ្ឋអាមេរិក។

កាលពីថ្ងៃទី 2 ខែកញ្ញា ក្រសួងយុត្តិធម៌អាមេរិកបានប្រកាសថា រដ្ឋាភិបាលអាមេរិកបានរឹបអូសយន្តហោះដែលប្រើដោយប្រធានាធិបតីវេណេស៊ុយអេឡា Nicolas Maduro បន្ទាប់ពីមន្ត្រីអាមេរិកបានកំណត់ថាការទិញយន្តហោះនេះ “បំពានលើទណ្ឌកម្ម និងច្បាប់គ្រប់គ្រងការនាំចេញ” របស់ទីក្រុងវ៉ាស៊ីនតោន ។
យោងតាមក្រសួងយុត្តិធម៌អាមេរិក យន្តហោះ Dassault Falcon 900EX ត្រូវបានរឹបអូសនៅព្រឹកថ្ងៃទី 2 ខែកញ្ញា នៅសាធារណរដ្ឋដូមីនីកា ហើយបានផ្ទេរទៅឱ្យមន្ត្រីសហព័ន្ធនៅរដ្ឋផ្លរីដា (សហរដ្ឋអាមេរិក)។
មន្ត្រីជាន់ខ្ពស់របស់សាធារណរដ្ឋដូមីនីកាបានប្រាប់ CNN ថា យន្តហោះនេះត្រូវបានចតនៅ Dominica សម្រាប់ការថែទាំនៅពេលវាត្រូវបានរឹបអូសដោយអាជ្ញាធរសហរដ្ឋអាមេរិក។ទូរទស្សន៍ CNN បានដកស្រង់សម្តីមន្ត្រីអាមេរិកមួយចំនួនដែលនិយាយថា យន្តហោះនេះគឺដូចជា “Air Force One របស់វេណេស៊ុយអេឡា”។
អគ្គមេធាវីអាមេរិក Merrick Garland បាននិយាយថា “ក្រសួងយុត្តិធម៌បានរឹបអូសយន្តហោះដែលយើងចោទប្រកាន់ថាបានទិញដោយខុសច្បាប់ក្នុងតម្លៃ 13 លានដុល្លារ ហើយបានរត់ពន្ធចេញពីសហរដ្ឋអាមេរិកទៅឱ្យលោក Nicolas Maduro និងសាច់ញាតិរបស់គាត់ដើម្បីប្រើប្រាស់” ។
ក្រសួងយុត្តិធម៌អាមេរិកបាននិយាយថា ការស៊ើបអង្កេតពីចុងឆ្នាំ 2022 ដល់ដើមឆ្នាំ 2023 បានរកឃើញថា មនុស្សដែលមានទំនាក់ទំនងជាមួយលោក Maduro បានចោទប្រកាន់ថាបានប្រើប្រាស់ក្រុមហ៊ុន ដែលមានមូលដ្ឋាននៅក្នុងតំបន់ Caribbean ដើម្បីលាក់ការទិញយន្តហោះ Dassault Falcon 900EX ដោយខុសច្បាប់ពីក្រុមហ៊ុនដែលមានមូលដ្ឋាននៅរដ្ឋ Florida ៕ ដោយធីរីណា

រូបថត​: AFP