ភ្នំពេញ៖ មនុស្សប្រុសស្រីចំនួន៣នាក់រងរបួសធ្ងន់និងស្រាលត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ បន្ទាប់ពីជិះម៉ូតូខ្វះការប្រុងប្រយ័ត្នជ្រុលទៅបុកគ្នាយ៉ាងពេញទំហឹងនៅផ្លូវបំបែកជាបួន ។
ហេតុការណ៍នេះបានកេីតឡេីងកាលពីវេលាម៉ោង១១និង៣៥នាទីយប់ ថ្ងៃទី៣ ខែកញ្ញា ឆ្នាំ២០២៤ នៅចំណុចស្តុបវិទ្យាល័យទួលស្វាយព្រៃ ផ្លូវម៉ៅសេទុងកែងផ្លូវលេខ១៩៩សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។
យោងតាមប្រភពពីពលរដ្ឋដែលឃេីញហេតុការណ៍បានអោយដឹងថា មុនពេលកេីតហេតុ គេបានឃើញបុរសម្នាក់ជិះម៉ូតូម៉ាកហុងដាស្កូពី ពណ៌ខ្មៅ ពាក់ស្លាកលេខ ភ្នំពេញ 1HZ-6025 ធ្វើដំណើរតាមបណ្ដោយផ្លូវលេខ១៩៩ ក្នុងទិសដៅពីលិចទៅកេីត លុះមកដល់ចំណុចកេីតហេតុដែលជាផ្លូវបំបែកជាបួនហើយមានភ្លេីងស្តុប អ្នកបេីកបរមិនគោរពក៏បន្តជិះទៅមុខ ហើយគាប់ជួនពេលនោះក៏ស្រាប់តែមានបុរសម្នាក់រួមដំណើរជាមួយនឹងនារីម្នាក់បានជិះម៉ូតូម៉ាក ហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1FS-1218 ធ្វើដំណើរតាមបណ្ដោយផ្លូវម៉ៅសេទុង ក្នុងទិសដៅពីជើងទៅត្បូងដោយល្បឿនលឿន ក៍ជ្រុលទៅបុកម៉ូតូហុងដាស្កូពីដែលជិះបំពានភ្លើងស្តុបយ៉ាងពេញទំហឹង បណ្តាលឲ្យម៉ូតូហុងដាឌ្រីមរងការខូចខាតវៀចខ្នងកង់មុខ ព្រមទាំងធ្វើនារីអង្គុយខាងក្រោយរងរបួសបែកក្បាលនិងបាក់ជើងខាងឆ្វេង អ្នកទាំង២ត្រូវបានដឹកតាមរថយន្តសាមុយយកទៅសង្គ្រោះនៅមន្ទីរពេទ្យរុស្ស៊ីភ្លាមៗផងដែរ ។
ដោយឡែកខាងម៉ូតូស្កូពីវិញរងការខូចខាតផ្នែកខាងមុខ មនុស្សរងរបួសរលាត់មុខហូរឈាម សន្លប់ស្តូកមួយសន្ទុះទើបដឹងខ្លួនវិញ តែមិនបានទៅមន្ទីរពេទ្យភ្លាមៗនោះទេ ។
ក្រោយពេលកេីតហេតុក៏មានតំណាងភាគីទាំងសងខាងបានធ្វេីការសម្របសម្រួលគ្នាដោយសុខចិត្តស្មេីគ្នានិងយកមធ្យោបាយទៅជួសជុលហើយនិងព្យាបាលរបួសរៀងៗខ្លួន៕ ដោយ៖ សុខាសែនជ័យ
