ខេត្តពោធិ៍សាត់ ៖ ប្រជាការពារភូមិ នគរបាលប៉ុស្តិ៍រដ្ឋបាលព្រងិល បានឲ្យដឹងនាព្រឹកថ្ងៃអាទិត្យ ១៣កើត ខែភទ្របទ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១៥ ខែកញ្ញា ឆ្នាំ២០២៤ នេះថា នៅវេលាព្រឹកព្រលឹមនេះ បានឃាត់ខ្លួនជនសង្ស័យចំនួន៣នាក់ រួមទាំងគោយន្តកន្រ្តៃ១គ្រឿង មានផ្ទុកមេគោចំនួន០២ក្បាលផងដែរ ខណៈមានប្រជាពលរដ្ឋប្រទះឃើញ ក៍បានប្រាប់ទៅម្ចាស់គោ រួចប្ដឹងបន្តទៅសមត្ថកិច្ចនគរបាលប៉ុស្តិ៍នគរបាលរដ្ឋបាលព្រងិល ។

សេចក្ដីរាយការណ៍ដដែលឲ្យដឹងទៀតថា ករណីសមត្ថកិច្ចនគរបាលឃាត់ខ្លួនជនពាក់ព័ន្ធ(ចោរលួចគោ០២)ក្បាលនេះ ស្ថិតនៅភូមិក្បាលទាហ៊ាន ឃុំឈើតុំ ស្រុកក្រគរ ខេត្តពោធិ៍សាត់ ។ ចំណែកម្ចាស់សត្វពាហនៈ(គោ)រស់នៅភូមិប៊ុនរ៉ានីសែនជ័យដំណាក់ត្រយឹង ឃុំព្រងឹល ស្រុកភ្នំក្រវាញ ខេត្តពោធិ៍សាត់ ។

សេចក្ដីរាយការណ៍បញ្ជាក់បន្ថែមបន្តទៀតថា បច្ចុប្បន្ន ជនសង្ស័យទាំងចំនួន០៣នាក់ រួមទាំងវត្ថុតាងគោយន្ដកន្រ្តៃ០១គ្រឿង សត្វពាហនៈ(គោ)ញីចំនួន០២ក្បាល នាំយកទៅបន្តនីតិវិធី នៅប៉ុស្តិ៍នគរបាលរដ្ឋបាលព្រងិល បញ្ជាក់ជនសង្ស័យទាំងចំនួន០៣នាក់ មានអ្នកលក់ អ្នកទិញ និងអ្នកដឹកផងដែរ ៕ ដោយៈ ប៉ឹម ពិន