ភ្នំពេញ ៖ លោកអ្នកឧកញ៉ា អ្នកឧកញ៉ា និងឧកញ៉ា ជាថ្នាក់ដឹកនាំក៏ដូចជាសមាជិកនៃសមាគមឧកញ៉ាកម្ពុជា ជាច្រើនរូបបានអញ្ជើញចូលរួមក្នុងកម្មវិធីពិសេស Gala Dinner នៅមុខប្រាសាទបាយ័ននាខេត្តសៀមរាបដែលបានប្រារព្ធធ្វើឡើងនៅរាត្រីថ្ងៃទី១៧ ខែកញ្ញា ឆ្នាំ២០២៤នេះដើម្បីជាកិច្ចស្វាគមន៍ចំពោះប្រតិភូព្រមទាំងភ្ញៀវកិត្តិយសជាតិ និងអន្តរជាតិដែលបានធ្វើដំណើរមកចូលរួមព្រឹត្តិការណ៍ Gumball 3000 x Chip Mong in Cambodia ។

សូមបញ្ជាក់ថា ព្រឹត្តិការណ៍នេះ ទទួលបានគោលការណ៍អនុញ្ញាតពីរាជរដ្ឋាភិបាលកម្ពុជា ក្រោមការចង្អុលបង្ហាញពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដោយមានក្រសួងទេសចរណ៍ដឹកនាំសម្របសម្រួលជាមួយក្រសួង-ស្ថាប័នពាក់ព័ន្ធ ពិសេសគឺការសហការជាមួយក្រុមហ៊ុន ជីប ម៉ុង គ្រុប ក្នុងការរៀបចំព្រឹត្តិការណ៍នេះឡើង ក្នុងគោលបំណងលើកស្ទួយកិត្យានុភាពជាតិ និងវិស័យទេសចរណ៍ ជាពិសេសបង្កើនការផ្សព្វផ្សាយយុទ្ធនាការ «ទស្សនាសៀមរាប២០២៤» ព្រមទាំងដើម្បីប្រមូលថវិកាបរិច្ចាគជូនមន្ទីរពេទ្យកុមារអង្គរ ខេត្តសៀមរាប និងជាឱកាសជំរុញការវិនិយោគ ពាណិជ្ជកម្ម និងការអភិវឌ្ឍសេដ្ឋកិច្ចផងដែរខណៈដែលគណៈប្រតិភូដែលចូលរួមក្នុងព្រឹត្តិការណ៍នេះមានជាង៤០%សុទ្ធតែជាពាណិជ្ជករធំៗ និងជាសេដ្ឋីប្រាក់លានដុល្លារ ដែលនឹងជួបពិភាក្សាផ្នែកធុរកិច្ចជាមួយពាណិជ្ជករក្នុងស្រុកដើម្បីទាក់ទាញការវិនិយោគមកកាន់កម្ពុជានាពេលខាងមុខ ៕

ដោយ ៖ សិលា