ភ្នំពេញ៖ ប្រជាការពារភូមិព្រែកហូរក្រុងទឹកខ្មៅម្នាក់ បានដួលបោកក្បាលស្លាប់ភ្លាមៗ ខណៈត្រូវរថយន្ដមិនចាំម៉ាកមួយគ្រឿងបើកបុកក្រោយពេញទំហឹងហេីយរថយន្ដបង្កបើករត់គេចខ្លួនបាត់ស្រមោល កាលពីបវេលាម៉ោង០៦ និង១២ នាទីព្រឹកនៅថ្ងៃទី០៩ ខែតុលា ឆ្នាំ២០២៤ ស្ថិតតាមបណ្ដោយផ្លូវ៦០ម៉ែត្រ ក្នុងភូមិគោលរកា សង្កាត់ចាក់អង្រែក្រោម ខណ្ឌមានជ័យ។
ជនរងគ្រោះមានឈ្មោះ ហាក់ ទ្រី ភេទប្រុស អាយុ៤៧ឆ្នាំមុខរបរជាប្រជាការពារភូមិស្នាក់នៅ សង្កាត់ព្រែកហូរក្រុងតាខ្មៅខេត្តកណ្តាល។
តាមប្រភពព័ត៌មានពីកន្លែងកើតហេតុបានប្រាប់អោយដឹងថា មុនពេលកើតហេតុមានបុរសម្នាក់បាត់ជិះម៉ូតូហុងដាសង់ឌ្រីមC១២៥ ស៊េរី២០១៥ពណ៌ខ្មៅ ពាក់ផ្លាកលេខកណ្ដាល 1S. 8828 តាមធ្វើដំណើរតាមបណ្ដោយផ្លូវ៦០ម៉ែត្រ ពីទិសដៅពីត្បូងមកជើងក្នុងល្បឿនលឿន ខណៈធ្វើដំណើរដល់ចំនុចកើតហេតុខាងលើក៏ឃើញមានរថយន្ដមិនចាំម៉ាកមួយគ្រឿងតាមធ្វើដំណើរពីខាងក្រោយ ស្របទិសគ្នាក្នុងល្បឿនលឿន ក៏បានរេចង្កូតបុកម៉ូតូជនរងគ្រោះពីក្រោយបណ្ដាលដួលពីលើម៉ូតូខ្ទាតចេញជាង២ម៉ែត្រ បោកក្បាលនិងថ្នល់ជាតិស្លាប់ភ្លាមៗនៅនិងកន្លែងកើតហេតុ ចំណែករថយន្ដបង្កបានបន្ដបើករត់គេចចេញពីកន្លែងកើតហេតុបាត់ស្រមោល។
បច្ចុប្បន្នសមត្ថកិច្ចកំពុងធ្វើការស្រោវជ្រោវរថយន្ដដែលបង្កដើម្បីមកដោះស្រាយតាមផ្លូវច្បាប់ ។
ក្រោយពេលកើតហេតុសមត្ថកិច្ចមូលដ្ឋាន បានធ្វើការទាក់ទងទៅខាងសមត្ថកិច្ចជំនាញការរិយាល័យចរាចរណ៍ផ្លូវគោក រាជធានីភ្នំពេញដេីម្បីធ្វើការវាស់វែងនឹងយកម៉ូតូជនរងគ្រោះយកទៅរក្សាទុកជាបណ្ដោះអាសន្ន ចំណែកសពត្រូវបានសមត្ថកិច្ចនគរបាលបានធ្វេីលិខិតរួចក៏ប្រគល់សពអោយក្រុមគ្រួសារដេីម្បីយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
