ភ្នំពេញ៖ យោងតាមរបាយការណ៍ពី នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈស្តីពីការរឹតបន្ដឹងច្បាប់ស្ដីពីចរាចរណ៍ផ្លូវគោក នៅថ្ងៃទី១៩ ខែតុលា ឆ្នាំ២០២៤នេះ បានបង្ហាញពីលទ្ធផលរយៈពេល ១៩ ថ្ងៃ ពីថ្ងៃទី១-១៩ ខែតុលា ឆ្នាំ២០២៤ ខណៈយានយន្តបានចូលគោលដៅចំនួន ៤,៥៥០គ្រឿង, រថយន្តធំ ៨៣គ្រឿង, រថយន្តតូច ១,៧៨៣គ្រឿង, ម៉ូតូ ២,៦៨៤គ្រឿង ។ ក្នុងនោះរកឃើញយានយន្តល្មើសសរុបចំនួន ៣,៣៥៩គ្រឿង, រថយន្តធំ ៥១គ្រឿង, រថយន្តតូច ១,១៦១គ្រឿង និងម៉ូតូ ២,១៤៧គ្រឿង ត្រូវបានផាកពិន័យតាមអនុក្រឹត្យ លេខ ៣៩.អនក្រ.បក នៅទូទាំងប្រទេស។
ជាក់ស្ដែងនៅរសៀលថ្ងៃទី១៩ ខែតុលានេះដែរ នាយកដ្ឋាននគរបាលចរាចរណ៍ បានបង្ហាញពីលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោក ខណៈកម្លាំងសមត្ថកិច្ចជំនាញចរាចរណ៍នៅទូទាំងប្រទេសកម្ពុជា រកឃើញយានយន្តល្មើសចំនួន ២៤៩គ្រឿងទៀត ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស។
ក្នុងប្រតិបត្តិការនោះ ចំនួនគោលដៅសរុប ១៦៣គោលដៅ មានយានយន្តចូលគោលដៅចំនួន ៣២៧គ្រឿង, រថយន្តធំ ៤គ្រឿង, រថយន្តតូច ១០២គ្រឿង និងម៉ូតូ ២២១គ្រឿង ក្នុងនោះរកឃើញ យានយន្តល្មើសសរុបចំនួន ២៤៩គ្រឿង, រថយន្តធំ ៤ គ្រឿង, រថយន្តតូច ៦៣គ្រឿង និងម៉ូតូ ១៨២គ្រឿង ត្រូវបាន ផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស ។
របាយការណ៍ដដែល បានវាយតម្លៃថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្ត ល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍យ៉ាងល្អប្រសើរ៕ដោយ៖តារា
