ខេត្តកណ្តាល៖ រដ្ឋបាលខេត្តកណ្តាល នៅព្រឹកថ្ងៃចន្ទទី២៨ ខែតុលា ឆ្នាំ២០២៤នេះ មានកិត្តិយសសូមជម្រាបជូនដំណឹងដល់ សម្តេច ទ្រង់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា លោកឧកញ៉ា លោក លោកស្រី និងបងប្អូនប្រជាពលរដ្ឋទាំងអស់មេត្តាជ្រាបថា៖ រដ្ឋបាលខេត្តកណ្តាល សូមធ្វើការបិទចរាចរណ៍រថយន្តដឹកទំនិញធុនធ្ងន់ នៅលើកំណាត់ផ្លូវជាតិលេខ១ ចាប់ពី ស្តុបបំបែកខ្នែងផ្លូវជាតិលេខ១ កែងផ្លូវជាតិលេខ២១បេ រហូតដល់គល់ស្ពានអ្នកលឿង ត្រើយខាងលិច ចាប់ពីម៉ោង ១២:០០នាទីថ្ងៃត្រង់ រហូតដល់ម៉ោង ១៥:០០នាទីរសៀល ថ្ងៃទី ៣០ ខែតុលា ឆ្នាំ២០២៤ ដើម្បីប្រារព្ធពិធីរត់ភ្លើងគប់ អបអរសាទរ ពិធីបើកកីឡាជាតិលើកទី៤ និងកីឡា ជនពិការលើកទី២ ឆ្នាំ២០២៤ ដែលនឹងចាប់ផ្តើមរត់ ពីទីតាំងបើកការដ្ឋាន ព្រែកជីកហ្វូណនតេជោ ស្ថិតនៅភូមិព្រែកតាកែវ ឃុំសំរោងធំ ស្រុកកៀនស្វាយខេត្តកណ្តាល នៅលើផ្លូវជាតិលេខ១ ឆ្ពោះទៅកាន់ពហុកីឡដ្ឋានជាតិអូឡាំពិក។
នៅពេលពិធីចាប់ផ្តើមនៅម៉ោង ១៤:០០នាទីរសៀល ការធ្វើចរាចរនឹងត្រូវ បិទទាំងស្រុងក្នុងរយៈពេល១ម៉ោង ចាប់ពីទីតាំងបើកការដ្ឋាន ព្រែកជីកហ្វូណនតេជោ ឆ្ពោះមកភ្នំពេញចំងាយ ១គីឡូម៉ែត្រ បន្ទាប់មកនឹងបើកឱ្យចរាចរតែមួយ ចំហៀងផ្លូវរហូតដល់ពិធីត្រូវបានបញ្ចប់។
អាស្រ័យហេតុនេះសូម សម្តេច ទ្រង់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា លោកឧកញ៉ា លោក លោកស្រី និងបងប្អូនប្រជាពលរដ្ឋទាំងអស់ ព្រមទាំងស្ថាប័នមានសមត្ថកិច្ចពាក់ព័ន្ធមេត្តាជ្រាប និងជួយ ចូលរួមសហការ អនុវត្តតាមខ្លឹមសារសេចក្តីជូនដំណឹងនេះប្រកបដោយប្រសិទ្ធភាព៕
ដោយ៖តារា
