ភ្នំពេញ៖ ជនសង្ស័យ១០នាក់រួមនិងឧបករណ៍ប្រើប្រាស់មួយចំនួនត្រូវបានកម្លាំងសមត្ថកិច្ចចម្រុះធ្វើការបង្ក្រាបទីតាំងប្រើប្រាស់គ្រឿងញៀន។

ការចុះបង្ក្រាបទីតាំងប្រើប្រាស់គ្រឿងញៀនខាងលើនេះធ្វើឡើងកាលពីវេលាម៉ោង១១និង១០នាទីយប់ថ្ងៃទី០៩ ខែសីហា ឆ្នាំ២០១៦ នៅតំបន់មុខមន្ទីរពេទ្យព្រះកុសុមះ ហៅពេទ្យលោកសង្ឃ ស្ថិតនៅភូមិត្រពាំឈូក សង្កាត់ទឹកថ្លា ខណ្ឌសែនសុខ។

កម្លាំងចម្រុះនៃអធិការដ្ឋាននគរបាលខណ្ឌសែនសុខ ដឹកនាំដោយលោកវរសេនីយ៍ឯក ម៉ក់ ហុង អធិការនគរបាលខណ្ឌនិងកម្លាំងអន្តរាគមន៍ពិសេសរាជធានីជាច្រើននាក់ទៀត បានចុះបង្ក្រាបទីតាំងខាងលើនេះក្នុងនោះឃាត់ខ្លួនបានជនសង្ស័យ១០នាក់ ក្នុងនោះមានស្រី៤នាក់រួមនិងឧបករណ៍ប្រើប្រាស់មួយចំនួន។

លោក ម៉ក់ ហុង អធិការនគរបាលខណ្ឌ បានឲ្យដឹងថា ដោយមានបទបញ្ជារពីលោកអគ្គស្នងការរងនិងជាស្នងការរាជធានីភ្នំពេញ និងដោយមានការសម្របសម្រួលពីលោក ងិន ពេជ ព្រះរាជអាជ្ញរងនៃអយ្យការអមសាលាដំបូងរាជធានីភ្នំពេញ បានបញ្ជាមកលោកឲ្យចុះសហការណ៍និងធ្វើរដ្ឋបាលនៅចំណុចខាងលើដែលជាតំបន់ស្មុកស្មាញទើបលោកដឹកនាំកម្លាំងចុះមកបង្ក្រាបឲ្យដូចភ្លៀងរលឹមក្នុងនោះឃាត់ខ្លួនក្មេងដែលតែងតែដើរចោលផ្ទះនិងប្រមូលផ្តុំប្រើប្រាស់គ្រឿងញៀនដោយឃាត់ខ្លួនបាន១០នាក់ស្រី៤នាក់ដកហូតបានឧបករណ៍ប្រើប្រាស់គ្រឿងញៀនមួយចំនួននិងដាវមួយដើម។

គួរបញ្ជាក់ថា មួយរយៈចុងក្រោយនេះនគរបាលខណ្ឌសែនសុខ បានបើកយុទ្ធនាការឲ្យដូចភ្លៀងរឹមដោយចុះជាប់គ្នាទាំយប់ទាំងថ្ងៃតែម្តង និងបានប្រមូលក្រុមក្មេងដែរតែងតែដើរចោលផ្ទះមកប្រមូលផ្តុំប្រើប្រាស់គ្រឿងញៀនជាច្រើនអ្នកក្នុងនោះមានខ្លះបញ្ជូនទៅមណ្ឌលកែប្រែ និងខ្លះទៀតបញ្ជូនទៅតុលាការ។

បច្ចុប្បន្នក្រុមប្រើប្រាស់គ្រឿងញៀនរួមទាំងវត្ថុតាងខាងលើត្រូវបាននាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខ៕

ដោយ៖ តុង សីហា