ភ្នំពេញ៖ លោក ងិន សុបញ្ញា អគ្គលេខា ធិការសហព័ន្ធកីឡាទ្រីយ៉ាថ្លុងកម្ពុជាបានឲ្យដឹងថា សហព័ន្ធទ្រីយ៉ាថ្លុងកម្ពុជានឹង បញ្ជូនកីឡាករ២នាក់លើវិញ្ញាសាទ្រីអាថ្លុងទៅចូលរួមប្រកួតក្នុងព្រឹត្តិការណ៍អាយរ៉ូមែន ដែលរៀបចំដោយប្រទេសវៀតណាមនៅអំឡុងខែតុលា ឆ្នាំ២០១៦ខាងមុខនេះ។
លោកអគ្គលេខាធិការសហព័ន្ធរូបនេះបានបញ្ជាក់ថា អាយរ៉ូមែនគឺជាការប្រកួតដ៏ធំក្នុងប្រភេទកីឡាទ្រីយ៉ាថ្លុង គឺលើវិញ្ញាសាទ្រីអាថ្លុងដែលកម្ពុជាមិនធ្លាប់បានចូលរួមប្រកួតឡើយពីមុនមក ដោយកាប្រកួតនេះមានកម្រិតខ្ពស់ជាងវិញ្ញាសាទ្រីយ៉ាថ្លុងធម្មតា នោះ គឺវិញ្ញាសារនេះតម្រូវឲ្យកីឡាករម្នាក់លេង៣វិញ្ញាសាម្នាក់ឯងដូចជាហែលទឹក ចម្ងាយ១.៩០០ម៉ែត្រជិះកង់ចម្ងាយ៩០គីឡូ ម៉ែត្រនិងរត់ចម្ងាយ២១គីឡូម៉ែត្រ ខណៈដែលការប្រកួតទ្រីយ៉ាថ្លុងធម្មតាហែលទឹកត្រឹមចម្ងាយ១.៥០០ម៉ែត្រ ជិះកង់ចម្ងាយ តែ៤០គីឡូម៉ែត្រ និងរត់ចម្ងាយតែ១០គីឡូម៉ែត្រប៉ុណ្ណោះ ។
លោកបានបន្តទៀតថា សម្រាប់កម្ពុជានេះជាលើកទី១ដែលសហព័ន្ធទ្រីយ៉ាថ្លុង កម្ពុជាសម្រេចបញ្ជូនកីឡាករ២នាក់ទៅចូល រួមប្រកួត ប៉ុន្តែចំពោះលទ្ធផលយ៉ាងណានោះ គឺមិនទាន់អាចនិយាយបានទេ ដោយហេតុ ថាកម្ពុជាមិនធ្លាប់ចូលរួមប្រកួតវិញ្ញាសានេះពីមុនមកទេ។ បច្ចុប្បន្នសហព័ន្ធបាន និងកំពុងជំរុញដល់ការហ្វឹកហាត់យ៉ាង សកម្មដល់កីឡាករដែលនឹងត្រូវបញ្ជូនទៅប្រទេសវៀតណាមរួមមានកីឡាករឈុន ប៊ុនថន, កីឡាករ ពិច ពិសិដ្ឋ កីឡាករទាំងពីររូបនេះមានសមត្ថភាពគ្រប់គ្រាន់ក្នុងការប្រកួតប្រជែងជាមួយប្រទេសដដៃទៀតក្នុងការដណ្តើមយកមេដាយ។
លោកបន្តទៀតថា សម្រាប់កម្ពុជាយើងពិតជាមានឧបសគ្គខ្លះៗដែរពោលគឺកង្វះ បទពិសោធន៍និងមិនធ្លាប់ចូលរួមប្រកួត ព្រឹត្តិការណ៍ធំបែបនេះទេពីមុនមក ពិសេសការហ្វឹករបស់កីឡាករកីឡាការិនីយើងចាប់ផ្តើមនៅពេលដែលពួកគេពេញវ័យទើប មកហ្វឹកហាត់កីឡា ។ ទាំងនេះជាមូលហេតុ ធ្វើឲ្យកីឡាករកីឡាការិនីងាយនឹងបោះបង់ការប្រកួតនៅពាក់កណ្តាលទីដោយខ្វះ ភាពអំណត់ គឺខុសពីកីឡាករកីឡាការិនី របស់ប្រទេសដទៃ កីឡាករកីឡាការិនីរបស់គេហ្វឹកហាត់តាំងពីវិ័យក្មេងហើយបទ ពិសោធន៍របស់ពួកគេគ្រប់គ្រាន់ធន់នឹង វិញ្ញាសាដែលមានចម្ងាយឆ្ងាយ។
សម្រាប់ការប្រកួតលើកនេះលោកមិនហ៊ានរំពឹងថា កីឡាកររបស់កម្ពុជាអាច ទទួលបានជោគជ័យកម្រិតណានោះទេ តែសហព័ន្ធគ្រាន់តែរំពឹងថាកីឡាកយើងអាចទៅដល់ទីបានដោយមិនបោះបង់ការប្រកួតឡើយ ។
គួរបញ្ជាក់ថា កាលពីពេលថ្មីៗនេះ សហព័ន្ធទ្រីយ៉ាថ្លុងកម្ពុជាទើបតែទទួលបានកង់២គ្រឿងពីក្លិបកង់តាខ្មៅដែលបាន ឧបត្ថម្ភដល់កីឡាករសម្រាប់ធ្វើការហ្វឹកហាត់តម្រូវនឹងការប្រកួតអាយរ៉ូមែននេះ៕
ដោយ៖ សារីម
