ភ្នំពេញ​៖​ អង្គភាពប្រឆាំងអំពើពុករលួយ (ACU) នៅព្រឹកថ្ងៃទី១២ ខែវិច្ឆិកា ឆ្នាំ២០២៤នេះ​ បានឃាត់ខ្លួនលោក កន សុខកាយ អតីតអភិបាលស្រុកល្វាឯម ក្រោយយកលុយចំនួន ៣០ម៉ឺនដុល្លារ រត់ការចង់បានតំណែងតាមរយៈលោក លី សាម៉េត និងលោក ឡាច សំរោង។

គួររម្លឹកថា​ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី៨ ខែតុលា​ ឆ្នាំ​២០២៤កន្លងទៅ​នេះ បានចេញអនុក្រឹត្យ បញ្ចប់តំណែងលោក កន សុខកាយ ពីអភិបាលស្រុកល្វាឯម ខេត្តកណ្តាល។

យោងតាមអនុក្រឹត្យ បានបញ្ជាក់ឱ្យដឹងថា មូលហេតុនៃការដកដំណែងនេះ គឺដោយសារតែលោក កន សុខកាយ បានប្រព្រឹត្តកំហុសក្រមសីលធម៌ និងវិជ្ជាជីវៈ ធ្ងន់ធ្ងរ ផ្ទុយនឹងច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។

សូមបញ្ជាក់ដែរថា ការដកតំណែងអភិបាលស្រុកល្វាឯមរូបនេះ បានកើតមានឡើង ក្រោយសម្តេចតេជោ ហ៊ុន សែន បានបង្ហោះសារលើបណ្តាញសង្គមទាក់ទងនឹងបុគ្គលឈ្មោះ លី សាម៉េត ដែលបានធ្វើសកម្មភាពយកឈ្មោះសម្ដេច ទៅបោកប្រាស់ប្រាក់ពីប្រជាពលរដ្ឋជាច្រើននាក់។ ក្នុងចំណោមអ្នកដែលចាញ់បោកទាំងនោះ ក៏មានលោក កន សុកាយផងដែរ។

បើតាមសារសម្តេចតេជោ ហ៊ុន សែន បានឱ្យដឹងថា លោក កន សុខកាយ បានផ្ញើវីដេអូជូនសម្តេច ថា លោក លី សាម៉េត បានយកប្រាក់ពីគាត់ចំនួន ៣០ម៉ឺនដុល្លារ ដើម្បីរត់ការបានតំណែងជាអភិបាលក្រុងអរិយក្សត្រ៕ដោយ៖តារា