ខេត្តបន្ទាយមានជ័យ៖ បើទោះបីថា នេះមិនមែនជាភារកិច្ចរបស់ក្រសួង ប៉ុន្តែបន្ទាប់ពីបានពិនិត្យឃើញនូវការលំបាករបស់បងប្អូនប្រជាពលរដ្ឋ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បញ្ជាឲ្យក្រុមការងារ នាំយកគ្រឿងចក្រទៅជួយជួសជុលផ្លូវទំនប់ដែលទឹកហូរបុកដាច់ឡើងវិញ ។
ទំនប់ដែលទឹកហូរបុកដាច់នេះ មានទីតាំងស្ថិតនៅក្នុងភូមិបត់ត្រង់ធំខាងលិច ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ ។ ផ្លូវទំនប់នេះត្រូវបានសាងសង់ឡើងក្នុងឆ្នាំ១៩៩៣ ដោយអង្ករពលកម្ម និងបានប្រើប្រាស់ជាផ្លូវលំជនបទផង និងជាទំនប់ការពារទឹកជំនន់ផង ។ ផ្លូវទំនប់នេះ ត្រូវបានធ្វើការជួសជុលឡើងវិញចំនួន០២លើក គឺនៅក្នុងឆ្នាំ២០១១ និងឆ្នាំ២០១៣ ដោយថវិការបស់ឃុំបត់ត្រង់ ។
ទន្ទឹមនឹងការជួយជួសជុលផ្លូវទំនប់នេះ លោករដ្ឋមន្ត្រីក៏បានណែនាំដល់មន្ទីរធនធានទឹក និងឧតុនិយមខត្តបន្ទាយមានជ័យ ឲ្យជួយធ្វើការសិក្សាឡើងវិញ ទាំងលក្ខណៈបច្ចេកទេសរបស់តួទំនប់ និងការរៀបចំប្រព័ន្ធដោះទឹកឲ្យបានសមស្រប ជៀសវាងការខូចខាតដូចពេលនេះទៀត ៕
ដោយ៖ សំ វិច្ឆិកា
