ភ្នំពេញ៖ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល ជាតំណាងលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបពិភាក្សាការងារជាមួយ លោកស្រី Patricia Ongpin, UNAIDS Country Director for Cambodia, Lao PDR and Malaysia កាលពីរសៀលថ្ងៃទី១៨ ខែវិច្ឆិកា ឆ្នាំ២០២៤ម្សិលមិញ​នេះ នៅទីស្តីការក្រសួងសុខាភិបាល។

ជំនួបពិភាក្សានេះ ផ្តោតសំខាន់ទៅលើភាពជោគជ័យ និងការខ្វះចន្លោះ នៃការឆ្លើយតបនឹងមេរោគអេដស៍នៅកម្ពុជា រួមទាំងបញ្ហាប្រឈម នៃការឈានទៅសម្រេចគោលដៅ ៩៥ ៩៥ ៩៥ និងគោលដៅលុបបំបាត់ការចម្លងមេរោគអេដស៍ពីម្តាយទៅកូន។ ការវិភាគពីការគាំទ្ររវាងដៃគូ និងស្ថានភាពថវិកាគាំទ្រកម្មវិធីអេដស៍បច្ចុប្បន្ន ផែនការនិរន្តភាព រួមទាំងតួនាទីរបស់ក្រសួងសុខាភិបាលលើការធានានិរន្តរភាពឆ្លើយតបនឹងមេរោគអេដស៍ នៅក្នុងបរិបទពហុវិស័យ។

គួរបញ្ជាក់ផងដែរថា ការងាររបស់អង្គការ UNAIDS នៅក្នុងប្រទេសកម្ពុជា គឺធ្វើសកម្មភាពនៅកម្ពុជារយៈពេលជាង ៣០ឆ្នាំមកហើយ ដែលបានគាំទ្រដល់កម្ពុជា ក្នុងការឆ្លើយតបនឹងមេរោគអេដស៍ក្នុងប្រទេសកម្ពុជា រួមមានការផ្តល់ទិសដៅយុទ្ធសាស្រ្ត និងការណែនាំសម្រាប់ការឆ្លើយតបនឹងមេរោគអេដស៍ថ្នាក់ជាតិ តាមរយៈការគាំទ្រការអភិវឌ្ឍផែនការយុទ្ធសាស្រ្តជាតិសម្រាប់ឆ្លើយតបនឹងមេរោគអេដស៍/ជំងឺអេដស៍ និយាមបែបបទប្រតិបត្តិស្តង់ដា និងគោលការណ៍ណែនាំនានា សម្រាប់កម្មវិធីបង្ការ ធ្វើតេស្ត និងថែទាំ និងព្យាបាលអ្នកជំងឺអេដស៍។

ក្នុងជំនួបនេះ មានការអញ្ជើញចូលរួមពី លោកស្រីអគ្គនាយករងបច្ចេកទេសសុខាភិបាល លោកប្រធានមជ្ឈមណ្ឌលជាតិប្រយុទ្ធ នឹងជំងឺអេដស៍ លោកប្រធានមជ្ឈមណ្ឌលជាតិកំចាត់រោគរបេង និងហង់សិន តំណាងនាយកដ្ឋានប្រយុទ្ធនឹងជំងឺឆ្លង និងតំណាងនាយកដ្ឋានសហប្រតិបត្តិការអន្តរជាតិ នៃក្រសួងសុខាភិបាល៕ ដោយ​៖តារា​