ភ្នំពេញ៖ រថយន្តតូយ៉ូតាព្រុសមួយគ្រឿងខណៈអ្នកបេីកបរស្រវឹងស្រាបានជ្រុលទៅបុកក្បាលថ្មពុះចែកទ្រូងផ្លូវបណ្ដាលឱ្យរងការខូចខាតរថយន្តយ៉ាងធ្ងន់ធ្ងរ ។
ហេតុការណ៍នេះបានកេីតឡេីងនៅវេលាម៉ោង១០និង២០នាទីយប់ ថ្ងៃទី២០ ខែវិច្ឆិកា ឆ្នាំ២០២៤ ត្រង់ចំណុចភ្លើងស្តុបស្ថានទូតវៀតណាម ផ្លូវព្រះមុនីវង្សកែងផ្លូវ៤៣២ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកេីតហេតុ គេបានឃើញបុរសម្នាក់រួមដំណើរជាមួយនឹងនារីម្នាក់ បានបេីករថយន្តម៉ាកតូយូតាព្រុស ស៊េរីឆ្នាំ២០១០ ពណ៌ខ្មៅ ពាក់ស្លាកលេខ ភ្នំពេញ 2BW-3547 ធ្វើដំណើរតាមបណ្ដោយផ្លូវព្រះមុនីវង្សក្នុងទិសដៅពីត្បូងទៅជេីង ដោយអ្នកបេីកបរស្ថិតក្នុងស្ថានភាពស្រវឹង។ លុះបើកមកដល់ចំណុចកេីតហេតុ ក៏ជ្រុលទៅបុកក្បាលនាគថ្មពុះចែកទ្រូងផ្លូវយ៉ាងពេញទំហឹង បណ្តាលឱ្យរថយន្តខ្ទាតថយក្រោយវិញរងការខូចខាត ខ្ទេចស្រុញផ្នែកខាងមុខ តែមិនគ្រោះថ្នាក់ដល់មនុស្សដែលជិះក្នុងរថយន្តនោះទេ គ្រាន់តែអ្នកបេីកបរចុះពីលេីរថយន្ដក្នុងស្ថានភាពស្រវឹងត្រូវសមត្ថកិច្ចហៅទៅផ្លុំជាតិអាល់កុលតែប៉ុណ្ណោះ ។
ក្រោយពេលកេីតហេតុ រថយន្ដត្រូវសមត្ថកិច្ចជំនាញស្ទូចយកទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំដំណោះស្រាយ ៕ 
ដោយ៖ សុខាសែនជ័យ
