ភ្នំពេញ៖ ជនសង្ស័យពាក់ព័ន្ធគ្រឿងញៀនម្នាក់ ត្រូវបានកម្លាំងនគរបាលនាយកដ្ឋានបង្ក្រាបគ្រឿងញៀន ក្រសួងមហាផ្ទៃ ស្រាវជ្រាវតាមចាប់ ខ្លួនបានកាលពីវេលាម៉ោង៥និង៣០នាទីល្ងាច ថ្ងៃទី១១ ខែសីហា ឆ្នាំ២០១៦ នៅក្នុងផ្ទះ ហ្គេមបាញ់ត្រី ជ្រកក្រោមស្លាក 27 ណេត ស្ថិតនៅ តាមផ្លូវបេតុង ក្រុម១៥ ភូមិប៉ប៉្រកត្បូង សង្កាត់កាកាប ខណ្ឌពោធិ៍សែនជ័យ ។

តាមប្រជាពលរដ្ឋនៅក្បែរនោះបានឲ្យដឹងថា នៅវេលាម៉ោងខាងលើគេឃើញមានវត្តមាន នគរបាល ជាច្រើននាក់ ចុះមកចាប់ ឃាត់ខ្លួនមុខសញ្ញា គ្រឿងញៀន  បានម្នាក់ ហើយរកឃើញទូហ្គេមបាញ់ត្រីចំនួន២ នៅក្នុងផ្ទះ២៧ណេតក្នុងភូមិប៉ប្រកខាងត្បូង ។

ដោយឡែកជនសង្ស័យមិនត្រូវបាននគរបាលដែលមានវត្តមានចុះបង្ក្រាប បង្ហាញពីអត្តសញ្ញាណ  ឲ្យស្គាល់ឡើយ គ្រាន់តែបង្ហើបប្រាប់ថា កម្លាំងនគរបាល ឃាត់ខ្លួនមុខសញ្ញានៅផ្ទះហ្គេមបាញ់ត្រីខាងលើបានម្នាក់ ចំណែកជនសង្ស័យ ៤នាក់ផ្សេងទៀត ចាប់ឃាត់ ប្រមូលមកពីពីកន្លែងផ្សេងទេ ។

បើតាមអាជ្ញាធរ សមត្ថកិច្ច មូលដ្ឋានវិញ បានឲ្យដឹងថា កម្លាំងនគរបាលជំនាញ ក្រសួងចុះប្រតិបត្តិការ ពេលនេះ មិនបានសហការជាមួយអាជ្ញាធរមូលដ្ឋានឡើយ គ្រាន់តែ ប្រាប់ថា មនុស្សម្នាក់ត្រូវបានចាប់ខ្លួនក្នុងផ្ទះហ្គេម ចំណែក៤នាក់ផ្សេងទៀតចាប់ពីកន្លែងផ្សេងទេ ។

ផ្ទះខាងលើ ក្រោយពីបែកធ្លាយ មានដាក់ទូហ្គេមបាញ់ត្រី ចំនួន២គ្រឿងហើយម្ចាស់មិនឃើញ នៅផ្ទះទើបអាជ្ញាធរភូមិទំនាក់ទំនងទៅសាលាខណ្ឌ ចាត់វិធានការបន្ត ដើម្បីយកទៅរក្សាទុក ៕

ដោយ៖ សុខាសែនជ័យ