ភ្នំពេញ÷ថ្ងៃទី២ ខែធ្នូ ឆ្នាំ២០២៤នេះ គឺជាខួបទី៤៦ឆ្នាំនៃការបង្កើតរណសិរ្សសាមគ្គីសង្គ្រោះជាតិកម្ពុជា(១៩៧៨-២០២៤) នៅក្នុងតំបន់រំដោះ ភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះហើយជាចលនាប្រឆាំងកងទ័ពខ្មែរក្រហមនៃរបបកម្ពុជាប្រជាធិបតេយ្យ។ ចលនា២ធ្នូ ជាចលនាសាមគ្គីដែលត្រូវបានបង្កើតឡើងក្នុងស្ថានភាពដែលប្រទេសកម្ពុជាធ្លាក់ក្នុងគ្រោះមហន្តរាយធ្ងន់ធ្ងរនៃរបបខ្មែរក្រហម ក្រោមមេដឹកនាំជាន់ខ្ពស់របស់គណបក្សប្រជាជនកម្ពុជាបច្ចុប្បន្ន ដោយថ្នាក់ដឹកនាំទាំងនោះបង្កើតចលនាកម្លាំងទ័ពនិងបង្កើតបានជា «រណសិរ្សសាមគ្គីសង្គ្រោះជាតិកម្ពុជា» ដែលក្រោយមកបានប្តូរឈ្មោះជា «រណសិរ្សសាមគ្គីអភិវឌ្ឍន៍មាតុភូមិកម្ពុជា»។
ថ្នាក់ដឹកនាំទាំងនោះមានសម្ដេចមហាពញាចក្រីហេង សំរិន សម្ដេចធម្មពោធិសាល ជា ស៊ីមសម្ដេចអគ្គមហាសេនាបតីតេជោហ៊ុន សែន ជាស្ថាបនិកដ៏សំខាន់និង វរជនស្នេហាជាតិជាច្រើនរូបទៀត។
គេនៅចាំមិនភ្លេចទេថា កម្លាំងមហាសាមគ្គីរបស់ប្រជាជនកម្ពុជាគ្រប់ទិសទីបានក្រោកឈររួបរួមជាកម្លាំងនិងបានការឧបត្ថម្ភគាំទ្រយ៉ាងធំធេងពីប្រទេសមិត្តជិតឆ្ងាយលើសាកលលោក បានផ្ដួលរំលំរបបកម្ពុជាប្រជាធិបតេយ្យក្រោមការដឹកនាំរបស់មេផ្ដាច់ការប៉ុលពតហើយឈានដល់ទទួលបានជ័យជម្នះទាំងស្រុងនាថ្ងៃទី 7 មករាឆ្នាំ 1979។ ជ័យជម្នះថ្ងៃ 7 មករា1979 រហូតមកដល់សព្វថ្ងៃនេះ ធ្វើឱ្យកម្ពុជាមានការអភិវឌ្ឍរីកចម្រើនលើគ្រប់វិស័យ និងធ្វើឲ្យប្រជាជនកម្ពុជាចាំមិនភ្លេចឡើយ៕
(ស្រាវជ្រាវឯកសារដោយចៅតាជេត)
