ភ្នំពេញ ៖ ជនសង្ស័យម្នាក់រួមនិងថ្នាំញៀន១កញ្ចប់តូចត្រូវបានកម្លាំងអន្តរាគមន៍រាជធានីសហការជាមួយនិងកម្លាំងប៉ុស្តិ៍នគរបាលរដ្ឋបាលភ្នំពេញថ្មីបានធ្វើការឃាត់ខ្លួនខណៈរូបគេរក្សាទុកថ្នាំញៀនជាប់ខ្លួន។

ករណីឃាត់ខ្លួននេះនៅវេលាម៉ោង១១និង៤០នាទីព្រឹកថ្ងៃទី១៣ ខែសីហា ឆ្នាំ២០១៦ នៅតាមបណ្តោយផ្លូវ១០០៣ស្ថិតក្នុងភូមទំនប់ សង្កាត់ភ្នំពេញថ្មី ខណ្ឌសែនសុខ។

ជនសង្ស័យឈ្មោះ លុន ចាន់ណា ភេទប្រុសអាយុ២៥ឆ្នាំ មុខរបរមិនពិតប្រាកដ ស្នាក់នៅភូមិខ្មែរលើ សង្កាត់គោករការ ខណ្ឌព្រែកព្នៅ។

ប្រភពពីសមត្ថកិច្ចបានឲ្យដឹងថា មុននិងឃាត់ខ្លួនជនសង្ស័យខាងលើគឺកម្លាំងអន្តរាគមន៍បានចេញល្បាតក្នុងមូលដ្ឋានលុះមកដល់ចំណុចខាងលើក៏ឃើញជនសង្ស័យជិះម៉ូតូ១គ្រឿងម៉ាក ZoomerX ពណ៌ត្រូយចេក គ្មានស្លាកលេខគួឲ្យសង្ស័យក៏ឃាត់ឆែកឆេរកឃើញមានថ្នាំញៀន១កញ្ចប់តូចនៅជាប់ខ្លួនទើបសមត្ថកិច្ចឃាត់តែម្តង។

នៅចំពោះមុខសមត្ថកិច្ចជនសង្ស័យបានឆ្លើយសារភាពថា រូបគេបានទិញថ្នាំញៀននេះពីស្រ្តីម្នាក់ពុំស្គាល់អត្តសញ្ញាណនៅម្តុំមុខមន្ទីពេទ្យព្រះកុសុមៈ (ពេទ្យលោកសង្ឃ) ក្នុងតម្លៃ៣មុឺនរៀលដើម្បីយកទៅប្រើប្រាស់លុះជិះមកដល់ចំណុចខាងលើក៏ត្រូវសមត្ថកិច្ចឃាត់ខ្លួន។

បច្ចុប្បន្នជនសង្ស័យរួមនិងវត្ថុតាងកំពុងឃាត់ខ្លួននៅអធិាករដ្ឋានខណ្ឌសែនសុខ ដើម្បីចាត់ការតាមនីតិវិធី៕

ដោយ៖ តុង សីហា