ភ្នំពេញ៖ កម្លាំងសមត្ថកិច្ចនគរបាលខណ្ឌជ្រោយចង្វាឃាត់ខ្លួនជនសង្ស័យ១០នាក់ជាបន្តបន្ទាប់ពាក់ព័ន្ធរក្សាទុក និងប្រើប្រាស់គ្រឿងញៀន។ ប្រតិបត្តិការណ៍នេះធ្វើឡើងកាលពីម៉ោង៦ល្ងាចថ្ងៃទី១២ ខែសីហា ឆ្នាំ២០១៦ នៅចំណុចមុខវត្តគៀនឃ្លាំង តាមបណ្ដោយផ្លូវជាតិលេខ៦ ស្ថិតក្នុងភូមិគៀនឃ្លាំង សង្កាត់ខណ្ឌជ្រោយចង្វា។

សមត្ថកិច្ចនគរបាលខណ្ឌជ្រោយចង្វាបានឲ្យដឹងថា ជនសង្ស័យដែលបានឃាត់ខ្លួនខាងលើ ទី១-ឈ្មោះ ទន់ លិ អាយុ២៣ឆ្នាំ មានមុខរបរជាកម្មករសំណង់ ទី២-ឈ្មោះ ផល ឆាយយ៉ា អាយុ២៣ឆ្នាំ មានមុខរបរកម្មករសំណង់ ជនសង្ស័យទាំង២នាក់ ស្នាក់នៅបុរីប៉េងហួត ស្ថិតក្នុងសង្កាត់ព្រែកលៀប ខណ្ឌជ្រោយចង្វា ទី៣-ឈ្មោះ ជា លីដូ អាយុ២២ឆ្នាំ មានមុខរបរកម្មករសំណង់ ទី៤-ឈ្មោះ ទុំ សារ័ត្ន អាយុ២២ឆ្នាំ មានមុខរបរមិនពិតប្រាកដ ជនសង្ស័យទាំង២នាក់ស្នាក់នៅភូមិល្វា សង្កាត់កោះដាច់ ខណ្ឌជ្រោយចង្វា ទី៥-ឈ្មោះ ទូច មករា អាយុ២១ឆ្នាំ ទី៦-ឈ្មោះ សឿន រ៉ាត់ អាយុ១៧ឆ្នាំ ទី៧-ឈ្មោះ ចក់ កុសល់ អាយុ១៦ឆ្នាំ ជនសង្ស័យទាំង៣នាក់ស្នាក់នៅភូមិតាជោ ឃុំសារិកា កែវ ស្រុកល្វាឯម ទី៨-ឈ្មោះសាន សិនសីលា អាយុ១៣ឆ្នាំ មានមុខរបរជាសិស្ស ទី៩-ឈ្មោះ ខន មករា អាយុ១៤ឆ្នាំ មានមុខរបរជាងម៉ូតូ និងទី១០-ឈ្មោះ អុល ហៃ អាយុ១៧ឆ្នាំ ជនសង្ស័យទាំង៣នាក់ស្នាក់នៅភូមិវាល ឃុំឧកញ៉ាអ៊ុង ស្រុកល្វាឯម។

វត្ថុតាងដកហូតរួមមានម្សៅក្រាមពណ៌សថ្លា ចំនួន០៥កញ្ចប់ និងម៉ូតូ០៤គ្រឿង ទី១-ម៉ាក Smash Revo សេ១១០ ពណ៌ខ្មៅ ពាក់ស្លាកលេខ ភ្នំពេញ 1Q-6505, ទី២-ម៉ាក SmashV ពណ៌ខ្មៅ ពាក់ស្លាកលេខ ភ្នំពេញ 1BS-8782, ទី៣-ម៉ាក Wave ពណ៌ខ្មៅ ពាក់ស្លាកលេខ ភ្នំពេញ 1I-7615 និងទី៤-ម៉ាក ហុងដាឌ្រីសង់ សេ១២៥ ស៊េរី២០១៣ ពណ៌ខ្មៅ ពាក់ស្លាកលេខ ភ្នំពេញ 1BT-6402 ។

បច្ចុប្បន្នជនសង្ស័យទាំង១០នាក់ រួចនិងវត្ថុតាងត្រូវបានកម្លាំងសមត្ថកិច្ចឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ជូនទៅសាលាដំបូងចាត់ការបន្តតាមនីតិវិធី ៕

ដោយ៖ ជ្រោយពេជ្រ