ភ្នំពេញ៖ ជនសង្សយម្នាក់ធ្វើសកម្មភាពគាស់សោបន្ទប់ជួលប្រជាពលរដ្ឋប៉ុនប៉ងលួចទ្រព្យសម្បត្តិមិនបានសម្រេចត្រូវម្ចាស់ឃើញទាន់បិទទ្វារបន្ទប់ចាប់ប្រគល់ឲ្យសមត្ថកិច្ចប៉ុស្ដិ៍ចោមចៅ។

ករណីគាស់បន្ទប់នេះកើតឡើងនៅវេលាម៉ោង២ និង១៥នាទីរសៀលថ្ងៃទី១៣ ខែសីហា ឆ្នាំ២០១៦ តាមបណ្តោយផ្លូវវេងស្រេង ត្រង់ចំណុចមុខមន្ទីរពេទ្យឯករាជ្យ២ ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

តាមការបញ្ជាក់ពីប្រជាពលរដ្ឋបានឲ្យដឹងថា មុនពេលឈានដល់ការឃាត់ខ្លួននេះ ជនសង្ស័យខាងលើបានធ្វើសកម្មភាពគាស់សោបន្ទប់ជួលរួចរើកកាយដើម្បីរកទ្រព្យសម្បត្តិមានតម្លៃ។ លុះពេលម្ចាស់មកទាន់ឃើញជនសង្ស័យខាងលើកំពុងធ្វើសកម្មភាពក៏បិទទ្វារបន្ទប់ និងហៅបងប្អូនប្រជាពលរដ្ឋមកជួយចាប់ដើម្បីប្រគល់ឲ្យដឹងសមត្ថកិច្ចតែម្តង៕

ដោយ៖ សុខា សែនជ័យ