ខេត្តកំពង់ឆ្នាំង ៖ ហេតុការណ៍គ្រោះថ្នាក់ចរាចរណ៍បានកើតឡើងបណ្ដាលឲ្យនារី៣នាក់បានរងរបួសធ្ងន់និងស្រាល បន្ទាប់ពីរថយន្តសាំយ៉ុងមួយគ្រឿងបានបុកម៉ូតូរនារីរងគ្រោះចំពេញមួយទំហឹង ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១និង៣០នាទីរសៀលថ្ងៃទី១៤ ខែសីហា ឆ្នាំ២០១៦ នៅចំណុចផ្លូវខ្វែងទិសទល់មុខចំណតរថយន្តផ្សារលើ ក្នុងភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង។

នគរបាលចរាចរណ៍ក្រុងកំពង់ឆ្នាំងបានឲ្យដឹងថា ជនរងគ្រោះទាំង៣នាក់មានទី១-ឈ្មោះ អ៊ឹង សុលាត អាយុ១៦ឆ្នាំ រងរបួសធ្ងន់ បាក់ដៃ និងជើង ទី២-ឈ្មោះ ស្រី លក្ខ័ណ អាយុ១៦ រងរបួសធ្ងន់ និងទី៣-ឈ្មោះ ស្រី កែវ អាយុ១៧ឆ្នាំ រងរបួសស្រាលទាំងនារីរងគ្រោះទំាង៣នាក់មានទីលំនៅភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង  ។

សាក្សីនៅកន្លែងកើតហេតុឲ្យដឹងថា នៅមុនពេលកើតហេតុមានម៉ូតូមួយគ្រឿងម៉ាកហ្ស៊ុយសុយគីស្មាស់វី ពណ៌ខ្មៅ ពាក់ស្លាកលេខ ភ្នំពេញ 1BQ-៥១២៩ ជិះគ្នា៣នាក់ ធ្វើដំណើរក្នុងទិសដៅពីលិចទៅកើត នៅពេលមដល់ចំណុចកើតហេតុដែលជាចំណុចផ្លូវខ្វែងទិសគ្នាក៏មានរថយន្តម៉ាកសំាយ៉ុងមួយគ្រឿង ពណ៌ស ពាក់ស្លាកលេខ ភ្នំពេញ ២AA-០០៩៤ ធ្វើដំណើរក្នុងទិសដៅពីត្បូងទៅជើងដែលបើកក្នុងល្បឿនបោះពួយយ៉ាងលឿនក៏ជ្រុលទៅបុកម៉ូតូដែលកំពុងឆ្លងផ្លូវពេញទំហឹង បណ្តាលឲ្យរងរបួសធ្ងន់និងស្រាល៣នាក់ ហើយអ្នកបើកបររថយន្តបានរត់គេចខ្លួនបាត់តែម្តង ។

ក្រោយពេលកើតហេតុជនរងគ្រោះបានដឹកទៅសង្រ្គោះនៅមន្ទីរពេទ្យខេត្ត ប៉ុន្តែដោយសារស្ថានភាពធ្ងន់ធ្ងរក៏បញ្ជូនទៅសង្គ្រោះបន្តនៅមន្ទីរពេទ្យភ្នំពេញ ចំណែកមធ្យោបាយទាំងពីរត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងដើម្បីរងចាំការដោះស្រាយតាមនិតិវិធី ៕

ដោយ៖ ចន្ថា