ចាប់ពីឆ្នាំ២០២៥ទៅ ប្រជាជនរុស្ស៊ីនៅខេត្ត Nizhny Novgorod នឹងទទួលបានប្រាក់មួយលានរូប្លិ៍(ប្រហែល 10,000 ដុល្លារ) សម្រាប់កូនម្នាក់ៗដែលពួកគេផ្តល់កំណើត ក្នុងបរិបទនៃអត្រាកំណើតរបស់ប្រទេសធ្លាក់ចុះ។

ព័ត៌មាននេះត្រូវបានប្រកាសដោយអភិបាល Gleb Nikitin ដូច្នោះហើយ ការបង់ប្រាក់សម្រាប់កូនទី 1 និងទី 2 នឹងត្រូវបានផ្តល់ពីមូលនិធិសហព័ន្ធ ខណៈដែលការទូទាត់សម្រាប់កូនទី 3 និងទី 4 នឹងត្រូវបានផ្តល់ពីមូលនិធិក្នុងតំបន់។
បច្ចុប្បន្ននេះ អត្រាកំណើតនៅក្នុងប្រទេសរុស្ស៊ីគឺ 1.5 កូនក្នុងស្ត្រីម្នាក់ៗ ខណៈពេលដែលអត្រាកំណើតដែលត្រូវការដើម្បីរក្សាចំនួនប្រជាជនគឺ 2.1 កូនក្នុងស្ត្រីម្នាក់។ អត្រាកំណើតរបស់ទីក្រុងមូស្គូរួមជាមួយនឹងការខាតបង់ក្នុងសង្គ្រាមជាមួយអ៊ុយក្រែនបានរួមចំណែកដល់ការថយចុះចំនួនប្រជាជន ហើយអត្រាកំណើតរបស់រុស្ស៊ីបានឈានដល់កម្រិតទាបរយៈពេល 25 ឆ្នាំនៅចុងក្រោយនេះ។
រុស្សីបានអនុវត្តវិធានការផ្សេងទៀត ដើម្បីដោះស្រាយអត្រាកំណើតធ្លាក់ចុះ រួមទាំងការលើកទឹកចិត្តសិស្សស្រីដែលមានអាយុពី 18 ដល់ 23 ឆ្នាំ ឱ្យទទួលបានប្រាក់នៅពេលពួកគេមានកូន។ ប្រធានាធិបតី វ្ល៉ាឌីមៀ ពូទីន បានតែងតាំងប្រធានក្រុមប្រឹក្សាសហព័ន្ធ លោកស្រី Valentina Matvienko ឱ្យដឹកនាំក្រុមប្រឹក្សាថ្មី សំដៅអនុវត្តយុទ្ធសាស្ត្រសកម្មភាពលើគោលនយោបាយគ្រួសារ និងប្រជាសាស្រ្ត។
យុទ្ធសាស្ត្រនេះមានគោលដៅដូចជា “ការការពារ ការគាំទ្រ និងការពារគ្រួសារជាមូលដ្ឋានគ្រឹះនៃសង្គមរុស្ស៊ី” និងការពង្រឹងស្ថាប័នគ្រួសារ និងអាពាហ៍ពិពាហ៍ “ដោយផ្អែកលើការរក្សា និងលើកកម្ពស់តម្លៃគ្រួសារប្រពៃណី”។

រដ្ឋមន្ត្រីសុខាភិបាលរុស្ស៊ី លោក Yevgeny Shestopalov ក៏បានលើកទឹកចិត្តមនុស្សឱ្យមានកូន និងកុំប្រើការងាររវល់ជាលេសមិនរៀបការ។
អ្នកនាំពាក្យវិមានក្រឹមឡាំង លោក Dmitry Peskov បានពណ៌នាការធ្លាក់ចុះចំនួនប្រជាជនថាជា “បញ្ហាប្រឈមដ៏ធំ” ហើយបាននិយាយថា ការជំរុញកំណើនប្រជាជនតាមរយៈគោលនយោបាយថ្មីនឹងបង្កើតប្រទេស “ខ្លាំង” ។
យុទ្ធសាស្ត្រសកម្មភាពនឹងត្រូវបានអនុវត្តជាពីរដំណាក់កាល គឺចាប់ពីឆ្នាំ 2025 ដល់ឆ្នាំ 2030 និងពីឆ្នាំ 2031 ដល់ឆ្នាំ 2036។ គោលដៅនៃយុទ្ធសាស្ត្រនេះគឺដើម្បីលើកកម្ពស់ “របៀបរស់នៅរបស់គ្រួសារ” តាមរយៈប្រព័ន្ធផ្សព្វផ្សាយ និងការផ្សាយពាណិជ្ជកម្ម ខណៈពេលដែលផ្តល់ធនធានដើម្បីឱ្យគ្រួសារអាចមានកូនកាន់តែច្រើន៕

រូបថត​:GI