ភ្នំពេញ៖ បុរសម្នាក់បានបើករថយន្តប្រភេទដឹកទំនិញធុនធំសង្ស័យស្រវឹងស្រា រេចង្កូតឡើងលើសួនច្បារពុះចែកទ្រូងផ្លូវទៅបុកបង្គោលផ្សព្វផ្សាយពាណិជ្ជកម្មបាក់អស់មួយដើមហើយរថយន្តបន្តហោះរំលងទៅផ្លូវម្ខាងទៀតជ្រុលទៅបុករថយន្តហាយលែនឌ័រ​មួយគ្រឿងកំពុងធ្វេីដំណេីរ​ហើយរថយបង្កបន្តទៅបុកចូលផ្ទះពលរដ្ឋបណ្ដាលឱ្យរងការខូចខាតយ៉ាងដំណំ។
ហេតុការណ៍នេះបានកើតឡើងនៅវេលាម៉ោង៨និង៤០នាទីយប់ ថ្ងៃទី២៩ខែធ្នូ ឆ្នាំ២០២៤ ជិតផ្សារព្រែកជ្រៃ តាមបណ្ដោយផ្លូវ២១៧ សង្កាត់ ស្ពានថ្ម ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់បានបើករថយន្តប្រភេទដឹកទំនិញធុនធំ ចំណុះប្រាំតោន ម៉ាកហ៊ីយ៉ាន់ដាយ ពណ៌ស ពាក់ផ្លាកភ្នំពេញ 3G -2392 ធ្វើដំណើរតាមដងផ្លូវលេខ២១៧ ក្នុងទិសដៅពីជើងទៅត្បូងដោយល្បឿនលឿន លុះមកដល់ចំណុចកើតហេតុដែលជាផ្លូវកោងហើយណាមួយសង្ស័យអ្នកបើកបរស្រវឹងស្រាផងនោះទេីបធ្វើឲ្យរថយន្តជ្រុលចង្កូតទៅខាងឆ្វេងដៃឡេីង លើសួនច្បារពុះចែកផ្លូវបុកបង្គោលស្លាកផ្សព្វផ្សាយពាណិជ្ជកម្មបាក់អស់មួយដើម និងដើមផ្កាអស់២គុម្ព ហើយរថយន្តក៍បន្តទៅផ្លូវម្ខាងទៀតជ្រុលទៅកៀររថយន្តម៉ាក ហាយលែនឌ័រ​ ពណ៌ទឹកប្រាក់ ពាក់ផ្លាក ភ្នំពេញ 2AP-4713  ជិះជាលក្ខណៈគ្រួសារដែលនាំឱ្យរងការខូចខាតកាងមុខដល់សាច់ដែក ហើយរថយន្តបង្កក៏បន្តបុកចូលផ្ទះប្រជាពលរដ្ឋនៅក្បែរនោះបណ្តាលឲ្យរងការខូចខាតបន្ថែមទៀតផងដែរ ប៉ុន្តែក្នុងហេតុការណ៍នេះមិនមានមនុស្សណាម្នាក់រងរបួសនោះឡេីយ ដោយអ្នកបើកបរចុះពីលើរថយន្តទាំងស្ថានភាពស្រវឹងហើយព្យាយាមគេចខ្លួនបាត់  ។
ក្រោយមកក៏ឃើញមានសមត្ថកិច្ចមូលដ្ឋានបានទៅដល់ពិនិត្យឃើញថាមានការខូចខាតដូចជាបង្គោលស្លាកផ្សព្វផ្សាយពាណិជ្ជកម្មចំនួន១ដើម ដើមជ្រៃក្រឹមចំនួនពីរដើម រថយន្តហាយលែនឌ័រមួយគ្រឿងក៏ដូចជាទ្វារផ្ទះនិងរបងដែកប្រជាពលរដ្ឋមួយចំនួនរួមទាំងរថយន្តបង្កខូចខាតផ្នែកខាងមុខផងដែរ រួចក៏សម្រេចធ្វេីការវាស់វែងយករថយន្តនេះទៅរក្សាទុកនៅអធិការដ្ឋាននគរបាលខណ្ឌដង្កោ រង់ចាំដោះស្រាយគ្នានៅពេលក្រោយ  ៕ដោយ ៖ ភារ៉ា ដង្កោ