ភ្នំពេញ៖ ប្រជាពលរដ្ឋបានប្រទះឃើញបុរសម្នាក់ជាជនជាតិបរទេសដេកស្លាប់នៅលើចិញ្ចេីមផ្លូវមុខផ្ទះពលរដ្ឋបង្កការភ្ញាក់ផ្អើលទាំងព្រឹកព្រលឹម ថ្ងៃទី២ ខែមករា ឆ្នាំ២០២៥ ស្ថិតនៅផ្លូវលេខ១៣ ក្នុងសង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹងថា មុនពេលកើតហេតុ គេបានឃើញបុរសខាងលើអង្គុយនៅក្បែររទេះដែក១ នៅខាងមុខផ្ទះល្វែង នៅលើកំណាត់ផ្លូវលេខ១៣ ដោយស្ថានភាពបុរសខាងលើ ហាក់បីដូចជាមិនស្រួលខ្លួន ហេីយក៏មានមនុស្សយកទឹកទៅឱ្យផឹកផងដែរ។ក្រោយមកស្រាប់តែឃើញគាត់ដង្ហក់ខ្យល់ឈ្លក់ ក្អក ហើយក៏ដេកទៅ។ ដោយឃើញសភាពមិនស្រួលគេបាននាំគ្នារត់ទៅមើល ក៏ឃើញបុរសខាងលើមិនមានប្រតិកម្ម និងមិនមានកាយវិការអ្វីទាំងអស់ ទើបពលរដ្ឋនាំគ្នាទាក់ទងទៅសមត្ថកិច្ចមូលដ្ឋាន រួមទាំងរថយន្តសាមុយមកកន្លែងកេីតហេតុ ។
បន្តិចក្រោយមករថយន្តសាមុយរបស់មន្ទីរពេទ្យព្រះអង្គឌួងបានមកដល់ ហើយក្រុមគ្រូពេទ្យក៏បានចុះមកពិនិត្យ តែជាអកុសលបុរសខាងលើបានស្លាប់បាត់ទៅហើយ ទើបក្រុមគ្រូពេទ្យត្រឡប់ទៅវិញ ដើម្បីទុកឱ្យសមត្ថកិច្ចជំនាញធ្វើការបន្ត។ បន្ទាប់មកសមត្ថកិច្ចមូលដ្ឋានបានធ្វើការហ៊ុមព័ទ្ធខ្សែក្នុងប្រតិបត្តិការ ដេីម្បីកុំឱ្យមានអ្នកចូលមកក្បែរសព និងបានទាក់ទងទៅកាន់សមត្ថកិច្ចជំនាញខាងកោសល្យវិច័យឲ្យចុះមកពិនិត្យរកមូលហេតុនៃការស្លាប់ ដើម្បីអនុវត្តបន្តតាមនីតិវិធី៕
ដោយ៖ ភារ៉ា
