ភ្នំពេញ ៖ បុរសម្នាក់បេីករថយន្តពាក់ស្លាកលេខខេមរភូមិន្ទលឿនបួងចង្កូតផ្លូវបត់មិនផុតជ្រុលទៅបុករបាំងថ្មពុះចែកទ្រូងផ្លូវបណ្តាលឱ្យក្រឡាប់ផ្ងារជើង ។
ហេតុការណ៍នេះបានកើតឡើងកាលពីវេលាម៉ោង០៧និង៤០នាទីយប់ ថ្ងៃទី០៥ ខែមករា ឆ្នាំ២០២៥ ស្ថិតនៅតាមបណ្ដោយផ្លូវR8 ក្នុងតំបន់អភិវឌ្ឍន៍បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីបុរសជាសន្តិសុខបឹងកក់បានឱ្យដឹងថា មុនកើតហេតុគេឃើញបុរសម្នាក់បានបេីករថយន្តមួយគ្រឿងម៉ាកឡិចស៊ីស RX400h ពាក់ស្លាកលេខ ខេមរភូមិន្ទ05 2-2246 តាមបណ្ដោយផ្លូវR8 ក្នុងទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុ បុរសជាអ្នកបើករថយន្តបានបួងចង្កូត សង្ស័យមិនផុតក៏ជ្រុលទៅបុកខឿនបណ្ដាលឱ្យរថយន្តក្រឡាប់ផ្ងារជេីង តែសំណាងល្អមិនបង្កអោយនរណារងរបួស ។
ក្រោយពេលកេីតហេតុ ម្ចាស់រថយន្តឡិចសុីស បានជូនសំណងទៅកាន់ក្រុមហ៊ុនដេីម្បីបញ្ចប់រឿងនៅនឹងកន្លែងកើតហេតុ ៕ 
ដោយ៖សុខាសែនជ័យ
