ភ្នំពេញ ៖ មន្ត្រីជាន់ខ្ពស់អគ្គស្នងការដ្ឋាននគរបាលជាតិបានឲ្យដឹងថា ជនសង្ស័យជាឃាតករបាញ់សម្លាប់ លោក លឹម គឹមយ៉ា អតីតតំណាងរាស្ត្រ នៃអតីតគណបក្សសង្គ្រោះជាតិ នៅទីក្រុងបាងកក ប្រទេសថៃ កាលពីថ្ងៃទី០៧ ខែមករា ឆ្នាំ២០២៥ ពេលនេះត្រូវបានសមត្ថកិច្ចចាប់ខ្លួនបានហើយ។
ការចាប់ខ្លួនជនសង្ស័យនៅព្រៃស្វាយ ស្រុកមោងឫស្សី កាលពីម៉ោង ១រសៀលថ្ងៃទី៨ ខែមករា ឆ្នាំ២០២៥។ ជនសង្ស័យដែលចាប់ខ្លួនជាជនជាតិថៃ អតីតនាវិកយោធារបស់ថៃ។
អតីតសមាជិករដ្ឋសភាគណបក្សប្រឆាំងកម្ពុជាម្នាក់ ត្រូវខ្មាន់កាំភ្លើងបាញ់សម្លាប់ នៅក្នុងទីក្រុងបាងកក ប្រទេសថៃកាលពីថ្ងៃអង្គារ ទី៧ខែមករាឆ្នាំ២០២៥ ក្រោយបង្កហេតុ ខ្មាន់កាំភ្លើងម្នាក់បានជិះម៉ូតូពាក់មួកការពារគេចចេញពីកន្លែងកើតហេតុបាត់។ នេះបើតាមសេចក្តីរាយការណ៍របស់បណ្តាញព័ត៌មានថៃហើយត្រូវបានរាយការណ៍ ដោយទីភ្នាក់ងារសារព័ត៌មាន AFP។
សូមជម្រាបថា ករណីឃាតកម្មបាញ់សម្លាប់លោក លឹម គឹមយ៉ា បានកើតឡើងនៅម៉ោង ៥ និង ៣០នាទី កាលពីថ្ងៃទី ៧ មករា ឆ្នាំ២០២៥ ក្បែរវត្តបុណ្ណនិវេវិហារ ប្រទេសថៃ ខណៈឃាតករប្រហារពាក់មួកសុវត្ថិភាព ជិះម៉ូតូពណ៌ក្រហម។
ប៉ូលីសបានរាយការណ៍ដោយផ្នែកលើកាំមេរ៉ាសុវត្ថិភាពថា ឃាតករ ដែលបានបាញ់សម្លាប់ លោក លឹម គឹមយ៉ា គឺជិះម៉ូតូហុងដាវេវ ១០០ សេសេ ពណ៌ក្រហម ពាក់ស្លាកលេខ ៨៤៥។
លោក លឹម គឹមយ៉ា បានធ្វើដំណើរពីខេត្តសៀមរាបតាមរថយន្តក្រុងជាមួយភរិយាជនជាតិបារាំង និងពូគាត់ម្នាក់។ តែយ៉ាងណា ជនសង្ស័យជិះម៉ូរត់គេចខ្លួនបាត់៕ជ្រោយពេជ្រ
