ភ្នំពេញ÷ គ្រោះថ្នាក់ចរាចរណ៍មួយបានកើតឡើងរវាងរថយន្តស៊េរីទំនើបម៉ាក Escalade បុកជាមួយម៉ូតូបណ្តាលឲ្យយុវជនម្នាក់រងរបួសនឹងម៉ូតូរងការខូចខាត។
ហេតុការណ៍នេះកើតឡើងកាលពីវេលាម៉ោង១២ និង១០នាទីយប់រំលងអាធ្រាត្រឈានចូលថ្ងៃទី ១០ ខែមករា ឆ្នាំ២០២៥ នៅត្រង់ចំណុចមុខខារ៉ាអូខេសែន សុខ ផ្លូវ ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
រថយន្តស៊េរីទំនើបម៉ាក Escalade ពាក់ស្លាកលេខភ្នំពេញ2CA-8934 ចំណែកម៉ូតូហុងដាឌ្រីមសង់ពាក់ស្លាកលេខភ្នំពេញ1KY-1353ជិះដោយយុវជនម្នាក។
អ្នកឃើញហេតុការណ៍បានឲ្យដឹងថា, មុនពេលកើតហេតុគេឃើញមានរថយន្តសេរីទំនើប Escalade ពាក់ស្លាកលេខភ្នំពេញ2CA-8934 បើកបរតាមបណ្តោយផ្លូវ១៩៨៦ លុះមកដល់ចំណុចកើតហេតុអ្នកបើកបរបានបត់ចូលខារ៉ាអូខេ ក៏បុកជាមួយម៉ូតូហុងដាឌ្រីមសង់ពាក់ស្លាកលេខភ្នំពេញ1KY-1353 បើកបរដោយយុវជនម្នាក់ជិះផ្លូវត្រង់ ចំពីមុខពេញទំហឹង បណ្តាលលឲ្យរងការខូចខាតយ៉ាងដំណំ និងរងរបួស អ្នកបើកបររថយន្តនឹងអ្នកបើកបរម៉ូតូមិនត្រូវបានស្គាល់អត្តសញ្ញាណនោះទេ។
ក្រោយកើតហេតុសមត្ថកិច្ចមូលដ្ឋានបានមកដល់បានឲ្យភាគីទាំងសងខាងធ្វើការសម្របសម្រួលគ្នា ដោយឡែកខាងភាគីម៉ូតូឃើញរថយន្តគេស៊េរីទំនើប ដូចជាមានសភាពភ័យស្លន់ស្លោនិងភ័យខ្លាចផង ក៏បានប្រាប់ទៅភាគីរថយន្តសុំស្មើរគ្នា ចំណែកខាងរថយន្តក៏បានបើកចេញពីកន្លែងកើតហេតុភ្លាមៗ។
មតិមហាជនមូយចំនួននៅនិងកន្លែងកើតហេតុបានលើកឡើងថាហេតុអ្វីរថយន្តបើកបុកម៉ូតូសោះ ម្ចាស់ម៉ូតូមិនសុំសំណងពីម្ចាស់រថយន្តខ្លះគ្រាន់យកទៅជួសជុលម៉ូតូនិងព្យាបាលរបួស ហេតុអ្វីក៏ឃើញរថយន្តគេស៊េរីទំនើបក៏មានការភ័យខ្លាចម៉្លេះ? ចុងក្រោយម៉ូតូក៍ខូចខាត មនុស្សក៍រងរបួសដឹកតាមម៉ូតូកង់បីទៅសង្គ្រោះនៅឯមន្ទីពេទ្យតែប៉ុណ្ណោះ៕
ដោយ÷ចន្ទ លីហ្សា
