ភ្នំពេញ៖ កម្លាំងការិយាល័យព្រហ្មទណ្ឌកម្រិតធ្ងន់នៃស្នងការនគរបាលរាជធានីភ្នំពេញបានបញ្ជូនខ្លួនស្ត្រីម្នាក់ទៅអយ្យការអមសាលាដំបូងរាជធានីភ្នំពេញ នៅថ្ងៃទី២៤ខែមករាឆ្នាំ ២០២៥ ពាក់ព័ន្ធនឹងករណីឆបោកលុយជិត១ម៉ឺនដុល្លារ។
កាលពីថ្ងៃទី២១ខែមករាឆ្នាំ២០២៥ វេលាម៉ោង ៨.៣០នាទី កម្លាំងការិយាល័យព្រហ្មទណ្ឌកម្រិតធ្ងន់នៃស្នងការនគរបាលរាជធានីភ្នំពេញ បាននាំខ្លួនស្ត្រីម្នាក់ឈ្មោះយិន រម្នី ភេទស្រីអាយុ៣៧ឆ្នាំជនជាតិខ្មែរមុខរបរពេទ្យឆ្មប មានទីលំនៅផ្ទះលេខ៤៥៩ ផ្លូវលេខ២០០៥ ភូមិប៉ប្រកខាងជើងសង្កាត់កាកាបខណ្ឌពោធិ៍សែនជ័យរាជធានីភ្នំពេញ ពីបទឆបោក។ ការចាប់ខ្លួនស្ត្រីជនសង្ស័យខាងលើនេះធ្វើឡើងតាមដីកាបញ្ជាឲ្យចូលខ្លួន របស់លោក លឹម ប៊ុនហេង ព្រះរាជអាជ្ញារងអមសាលាដំបូងរាជធានីភ្នំពេញ បញ្ជាឲ្យឈ្មោះ យិន រម្នី ភេទស្រីអាយុ៣៧ឆ្នាំ ចូលបង្ហាញខ្លួននៅអយ្យការអមសាលាដំបូងរាជធានីភ្នំពេញឲ្យបានមុនថ្ងៃទី ៣០ ខែមករាឆ្នាំ២០២៥ នៅរៀងរាល់ម៉ោងធ្វើការដើម្បីសាកសួរលើបណ្ដឹងព្រហ្មទណ្ឌពីបទ ឆបោក តាមបណ្តឹងរបស់មេធាវីតំណាងឈ្មោះ យ៉ាង សភាវុធ ភេទប្រុស។
បច្ចុប្បន្នជនសង្ស័យកំពុងស្ថិតក្នុងដំណាក់កាលតំណាងអយ្យការបើកការស៊ើបសួរនៅឡើយ៕ ដោយ រ៉ារ៉ា