ខេត្តកំពង់ស្ពឺ÷ដើម្បីចូលរួមទទួលខុសត្រូវក្នុងការអនុវត្តឱ្យសម្រេចបានជោគជ័យ និងពង្រឹងការទទួលខុសត្រូវ និងភាពជាម្ចាស់របស់មូលដ្ឋាន ក្នុងការអនុវត្តកម្មវិធីនយោបាយ និងការដ្ឋានកំណែទម្រង់នានារបស់រាជរដ្ឋាភិបាល ឯកឧត្តមឧបនាយករដ្ឋមន្ត្រី ហ៊ុន ម៉ានី បានផ្តល់គោលការណ៍ណែនាំលើកិច្ចការអាទិភាពសំខាន់ៗ ចំនួន ១១ចំណុច រួមមាន៖ (១) ការការពារសន្តិភាព និងការពង្រឹងខឿនសន្តិសុខជាតិ (២) ការរក្សាស្ថិរភាព សន្តិសុខផ្ទៃក្នុង (៣) បន្តជំរុញចលនាក្នុងការអនុវត្តគោលនយោបាយ “ភូមិ-ឃុំ-សង្កាត់ មានសុវត្ថិភាព” (៤) ពង្រឹងការអនុវត្តច្បាប់ចរាចរណ៍ផ្លូវគោក (៥) ពង្រឹង និងលើកកម្ពស់ការគ្រប់គ្រងពន្ធនាគារ (៦) លើកកម្ពស់ការផ្តល់សេវាសាធារណៈ (៧) ពង្រឹងការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ (៨) ការអភិវឌ្ឍសេដ្ឋកិច្ច សង្គមក្នុងខេត្ត (៩) ការគ្រប់គ្រងធនធានធម្មជាតិ និងការចុះបញ្ជីដីធ្លី (១០) ការចូលរួមអនុវត្តកម្មវិធីគោលនយោបាយនានា របស់រាជរដ្ឋាភិបាល និង (១១) ការពង្រឹងរបៀបរបបការងារ។
ការណែនាំនេះ ក្នុងឱកាស លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ របស់រដ្ឋបាលខេត្តកំពង់ស្ពឺ នារសៀលថ្ងៃទី២៧ ខែមករា ឆ្នាំ ២០២៥។
ឧបនាយករដ្ឋមន្ត្រី ហ៊ុន ម៉ានី បន្ថែមថា អង្គសន្និបាតនាពេលនេះ គឺជាព្រឹត្តិការណ៍មួយ ដែលគ្រប់តួអង្គពាក់ព័ន្ធទាំងអស់ បានមកជួបជុំ និងរួមគ្នា ពិនិត្យ និងវាយតម្លៃអំពីសមិទ្ធផលលើគ្រប់វិស័យដែលរដ្ឋបាលខេត្តកំពង់ស្ពឺ សម្រេចបានក្នុងឆ្នាំ២០២៤ កន្លងទៅ ក៏ដូចជាដើម្បីស្វែងយល់ពីបញ្ហាប្រឈម សំណូមពរ ដំណោះ ស្រាយ និងកាលានុវត្តភាព ព្រមទាំងដាក់ចេញនូវទិសដៅការ ងារសម្រាប់ឆ្នាំ២០២៥ ក្នុងការចូលរួមចំណែកអនុវត្តគោលនយោបាយនានា និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ឱ្យកាន់តែមានភាពគ្រប់ជ្រុងជ្រោយ និងមានប្រសិទ្ធភាពខ្ពស់។
បន្ថែមលើនេះឧបនាយករដ្ឋមន្ត្រី បានផ្តល់អនុសាសន៍ឱ្យមានការចូលរួមអនុវត្តកម្មវិធីនយោបាយ និងការងារកែទម្រង់នានា របស់រាជរដ្ឋាភិបាលកម្ពុជា ដែលជារបៀបវារៈនយោបាយដ៏មានសារៈសំខាន់ សម្រាប់ការអភិវឌ្ឍប្រទេសជាតិ ប្រកបដោយទស្សនវិស័យច្បាស់ លាស់ និងវែងឆ្ងាយក្នុងការដឹកនាំកម្ពុជា ឱ្យកាន់តែមានការអភិវឌ្ឍរីកចម្រើនលើគ្រប់វិស័យជាបន្តទៀត។
ឆ្លៀតក្នុងឱកាសនេះឧបនាយករដ្ឋមន្ត្រី ហ៊ុន ម៉ានី បានសង្កត់ធ្ងន់ និងស្នើដល់រដ្ឋបាលខេត្ត ក្រុង ស្រុក និងមន្ទីរ អង្គភាពពាក់ព័ន្ធ ត្រូវពង្រឹងភាពជាម្ចាស់ក្នុងការអនុវត្តមុខងារដែលថ្នាក់ជាតិបានផ្ទេរ ស្របតាមគោលការណ៍ណែនាំដែលបានកំណត់ឱ្យសម្រេចបានលទ្ធផលល្អតាមការរំពឹងទុក។ ក្នុងករណីមានបញ្ហាប្រឈម ឬតម្រូវការចាំបាច់ណាមួយ សូមធ្វើសេចក្តីរាយការណ៍លម្អិតជូនក្រសួងមហាផ្ទៃ លេខាធិការដ្ឋាន គ.ជ.អ.ប ក្រសួង ស្ថាប័នពាក់ព័ន្ធ ដើម្បីថ្នាក់ជាតិ ផ្តល់ការគាំទ្រ និងមានវិធានការដោះស្រាយទៅតាមករណីជាក់ស្តែងឱ្យបានទាន់ពេលវេលា។
សូមជម្រាបជូនដែរថា ពិធីបិទសន្និបាតនេះ មានការឡើងថ្លែងមតិស្វាគមន៍ និងធ្វើសេចក្តីរាយការណ៍អំពីលទ្ធផលសន្និបាត ដោយបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ ព្រមទាំងមានពិធីបំពាក់គ្រឿងឥស្សរិយយស ជូនមន្ត្រីរាជការដែលមានស្នាដៃចំនួន ៦១រូបផងដែរ៕
