ខេត្តបន្ទាយមានជ័យ ៖ ក្មេងទំនើងម្នាក់ក្នុងចំណោមបក្ខពួក៨នាក់ជិះរថយន្ត១គ្រឿងធ្វើសកម្មភាពមានដំបងនិងដាវសាំម៉ូរ៉ៃដេញវាយបុរសម្នាក់កំពុងអង្គុយលេងលើវាលស្មៅកាស៊ីណូផ្កាយ៥ បណ្តាលឲ្យរងបួសធ្ងន់ ត្រូវបានឃាត់ខ្លួនពីកម្លាំងអាវុធហត្ថក្រុងប៉ោយប៉ែត ដោយឡែកបក្ខពួក៧នាក់ទៀតរត់គេចខ្លួនបាត់ ។
ហេតុការណ៍នេះកើតឡើងនៅវេលាម៉ោង១រំលងអាធាត្រឈានចូលថ្ងៃទី១៨ ខែសីហា ឆ្នាំ២០១៦ នៅចំណុចខាងជើងកាស៊ីណូផ្កាយប្រាំ ស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឲ្យដឹងថា ជនរងគ្រោះឈ្មោះ ឈឿត ឈឿយ ភេទប្រុស អាយុ៣៤ឆ្នាំ រស់នៅភូមិគោកចាស់ ឃុំសំបួរ ស្រុកក្រឡាញ់ ខេត្តសៀមរាប។ ចំណែកជនដៃដល់មានឈ្មោះ វ៉េត វណ្ណ: ភេទប្រុស អាយុ៣១ឆ្នាំ រស់ភូមិសាមគ្គីមានជ័យ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោកមេបញ្ជាការកងរាជអាវុធហត្ថក្រុងប៉ោយប៉ែត ឲ្យដឹងទៀតថា មុនពេលកើតហេតុជនរងគ្រោះ មកអង្គុយលេងនៅវាលស្មៅខាងជើងកាស៊ីណូផ្កាយប្រាំ មួយសន្ទុះក្រោយមកស្រាប់តែមានរថយន្តមួយគ្រឿងមានក្មេងទំនើងចំនួន៨នាក់ជិះមកដល់ចំណុចកើតហេតុនោះហើយពួកគេកក៏ចុះពីរថយន្តរត់យ៉ាងប្រសាចមានដបងនិងដាវសាំម៉ូរ៉ៃវាយនិងកាប់ទៅលើជនរងគ្រោះដោយមិនមានហេតុ បណ្ដាលឲ្យជនរងគ្រោះរបួសយ៉ាងធ្ងន់។ ក្រោយពីធ្វើសកម្មភាពរួចប្រជាពលរដ្ឋនៅទីនោះបានរាយការណ៍មកអាវុធហត្ថក្រុងប៉ោយប៉ែត ឲ្យចុះទៅជួយអន្តរាគមន៍។ លោកក៏បានដឹកនាំកម្លាំងផ្ទាល់មួយក្រុមចុះទៅដល់កន្លែងកើតហេតុ ហើយធ្វើការឃាត់ខ្លួនជនសង្ស័យម្នាក់ ចំណែក៧នាក់ទៀតឡើងជិះរថយន្តគេចខ្លួនបាត់អស់។
លោកវរសេនីយ៍ត្រី ជា ដា បានប្រាប់ឲ្យដឹងទៀតថា ជនសង្ស័យត្រូវបានបញ្ជូនបញ្ជាមកការដ្ឋានកងរាជអាវុធហត្ថខេត្តដើម្បីសាកសួរអនុវត្តន៍តាមផ្លូវច្បាប់ ដោយឡែកបក្ខពួករត់គេចខ្លួន ៧នាក់ទៀតអាវុធហត្ថកំពុងស្រាវជ្រាវដើម្បីស្វែងចាប់ខ្លួនយកមកផ្តន្ទាទោសតាមផ្លូវច្បាប់៕
ដោយ៖ សំ វិច្ឆិកា
