ភ្នំពេញ៖ ព្រឹកថ្ងៃទី១០ ខែកុម្ភៈ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្តែងការគួរសម និងជម្រាបលាពីសំណាក់ ស្ថាបនិក អង្គការសប្បុរសធម៌ឡៃហ្គ័រ និងសាលាភាពជាអ្នកដឹកនាំឡៃហ្គ័រ និងនាយកប្រចាំប្រទេស ដោយមានការចូលរួមពី គណៈប្រតិភូអង្គការសប្បុរសធម៌ឡៃហ្គ័រ ឯកឧត្តម លោកជំទាវ ថ្នាក់នាំក្រសួងអប់រំ យុវជន និងកីឡា និងអ្នកពាក់ព័ន្ធក្រោមឱវាទ។

សប្បុរសជន អង្គការ សប្បុរសធម៌ ឡៃហ្គ័រ និងសាលាភាពជាអ្នកដឹកនាំឡៃហ្គឺបានចូលរួមចំណែកក្នុងការអភិវឌ្ឍវិស័យអប់រំ តាមរយៈការជួយសាងសង់សាលា រៀន អគារ អន្តេវាសិកដ្ឋាន និងផ្តល់អាហារូបករណ៍ដល់សិស្សានុសិស្សកម្ពុជាចំនួន ១០៣ នាក់ ក្នុងរយៈពេល ១២ឆ្នាំមកនេះ ឱ្យទទួលបានឱកាសសិក្សានៅ សាលាភាពជាអ្នកដឹកនាំ ឡៃហ្គឺ និងដោយឡែកសិស្សរបស់ឡៃហ្គឺ ចំនួន ៦០នាក់ បានទទួលអាហារូបករណ៍បន្តការសិក្សានៅតាមសាកលវិទ្យាល័យអន្តរជាតិ ចំនួន ១០ ប្រទេសផ្សេងៗគ្នាផងដែរ។

មានប្រសាសន៍ក្នុងឱកាសនេះបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរ គុណយ៉ាងជ្រាលជ្រៅដល់ អង្គការសប្បុរសធម៌ឡៃហ្គ័រ និងសាលាភាពជាអ្នកដឹកនាំឡៃហ្គ័រ និងនាយកប្រចាំប្រទេស ដែលបានខិតខំប្រឹងប្រែង ជួយគាំទ្រលើវិស័យអប់រំ និងការអភិវឌ្ឍន៍យុវជននាពេលកន្លងមក ជា ពិសេសឆ្លើយតបនឹងចក្ខុវិស័យរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស និងគូសបញ្ជាក់ថា ការខិតខំប្រឹងប្រែងរបស់គណៈប្រតិភូនៃអង្គការសប្បុរសធម៌ឡៃហ្គ័រ ពិតជាបានជះផលវិជ្ជមានដល់សង្គមជាតិកម្ពុជា និងនៅជាប់នៅក្នុងចិត្តប្រជាជនកម្ពុជាជារៀងរហូត។ 

បន្ថែមលើនេះបណ្ឌិតសភាចារ្យ ឧបនាយករដ្ឋមន្ត្រីលើក ឡើងថា ពិធីបំពាក់គ្រឿងឥស្សរិយយសនាពេលនេះ គឺជាសក្ខីភាពនៃភាពជោគជ័យរបស់អង្គការ និងសង្ឃឹមជឿជាក់ថា ទោះបីជាមូលនិធិ Liger Charitable Foundation បានបញ្ចប់បេសកកម្មរបស់ខ្លួន និងជឿជាក់ថា មានឱកាសបន្តកិច្ចសហប្រតិបត្តិជាមួយគ្នាបន្តបន្ទាប់ទៀតនាពេលអនាគត ដើម្បីចូលរួមចំណែកអភិវឌ្ឍយុវជនកម្ពុជាឱ្យទទួលបានចំណេះដឹង និងសមត្ថភាពខ្ពស់ ក្នុងគោលដៅអភិវឌ្ឍន៍សេដ្ឋកិច្ចសង្គមជាតិនាពេលខាងមុខ។

ដើម្បីជាការលើកទឹកចិត្ត និងថ្លែងអំណរគុណចំពោះអង្គការ សប្បុរសធម៌ ឡៃហ្គ័រ ក្នុងការខិតខំប្រឹងប្រែង ជួយគាំទ្រដល់ប្រទេសកម្ពុជាក្នុងរយៈពេលជាច្រើនឆ្នាំកន្លងមកនេះ ក្រសួងអប់រំ យុវជន និងកីឡា បានបំពាក់ជូននូវគ្រឿងឥស្សរិយយស៣ គ្រឿង៖ មុនីសារាភ័ណ្ឌ ថ្នាក់មហាសេរីវឌ្ឍន៍ ជូនលោក Trevor Gile និងលោកស្រី Agnieszka Tynkiewicz-Gile ជាស្ថាបនិក អង្គការសប្បុរសធម៌ឡៃហ្គ័រ (The Liger Charitable Foundation) និងសាលាភាពជាអ្នកដឹកនាំឡៃហ្គឺ (Liger Leadership Academy) 

មុនីសារាភ័ណ្ឌ ថ្នាក់មហាសេនា ជូនលោក Dominic Sharpe ជានាយកប្រចាំប្រទេស អង្គការសប្បុរសធម៌ឡៃហ្គ័រ (The Liger Charitable Foundation) និងសាលាភាពជាអ្នកដឹកនាំឡៃហ្គឺ(Liger Leadership Academy) ៕