ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង នៅព្រឹកថ្ងៃចន្ទទី១៧ ខែកុម្ភៈ ឆ្នាំ២០២៥នេះ បានឱ្យដឹងថា សមត្ថកិច្ចនគរបាលស្រុកបាណន់ បន្តចាត់វិធានការក្តៅចំពោះក្រុមបង្ហោះម៉ូតូនៅមូលដ្ឋាន។
ជាក់ស្ដែងអនុវត្តតាមយោបល់ដឹកនាំរបស់លោកឧត្តមសេនីយ៍ទោដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង លោកវរសេនី យ៍ទោ ហេង បារាំង អធិការនគរបាលស្រុកបាណន់ កាលពីថ្ងៃទី១៦ខែ កុម្ភៈឆ្នាំ២០២៥ បានដឹកនាំកម្លាំងធ្វេីការឃាត់ខ្លួនក្រុមក្មេងទំនេីងបង្ហោះម៉ូតូបង្កឱ្យការប៉ះពាល់ដល់សណ្តាប់ធ្នាប់សង្គមនៅមូលដ្ឋានចំនួន០៣នាក់និងម៉ូតូចំនួន០២គ្រឿង បន្ទាប់ពីលោកទទួលបានព័ត៌មានពីប្រជាពលរដ្ឋដែលផ្តល់មកអំពីបញ្ហានេះនៅភូមិសាស្រ្តឃុំស្នឹង ស្រុកបាណន់ ខេត្តបាត់ដំបង។
ក្មេងទំនេីងទាំង០៣នាក់នេះសមត្ថកិច្ចបានធ្វេីការអប់រំ ណែនាំនឹងធ្វើកិច្ចសន្យាបញ្ឈប់ការបង្ហោះម៉ូតូបន្តទៀត ដោយដកហូតម៉ូតូទាំងពីរគ្រឿងមករក្សាទុកនៅអធិការដ្ឋាន រយៈពេល០៣ខែនឹងឱ្យអាណាព្យាបាលមកធានាទៅលំនៅដ្ឋានវិញដេីម្បីអប់រំបន្ត។
តាមរយៈទិដ្ឋភាពនេះ សូមយុវជនទាំងឡាយកុំយកតម្រាប់តាមពួកគេឱ្យសោះ ព្រោះទង្វេីខាងលេី បានប៉ះពាល់សណ្តាប់ធ្នាប់សង្គមនិងខូចខាតពេលវេលាកិត្តិយសខ្លួននិងក្រុមគ្រួសារផង សូមខិតខំសិក្សារៀនសូត្រ ក្លាយជាសិស្សល្អនិងកូនល្អ ៕
ដោយ៖តារា
