ភ្នំពេញ៖ នារីម្នាក់ កំពុងតែនិយាយទូរស័ព្ទតាមផ្លូវ ក៏ត្រូវជនសង្ស័យម្នាក់បានដើរមកជិត រួចក៏ធ្វើសកម្មភាពឆក់ទូរស័ព្ទ ហើយបានរត់គេច ក៏ត្រូវកងរាជអាវុធហត្ថ ខណ្ឌចំការមនមកជួយធ្វើអន្តរាគមន៍ចាប់ភ្លាមៗ នៅចំណុចច្រមុះជ្រូកក្បាលថ្នល់ តាមបណ្ដោយផ្លូវព្រះមុនីវង្សក្នុងសង្កាត់ផ្សារដើថ្កូវ ខណ្ឌចំការមន បង្កការភ្ញាក់ផ្អើលកាលពីវេលាម៉ោង២រំលងអធ្រាត្រ ឈានចូលថ្ងៃទី៣ ខែសីហា ឆ្នាំ២០១៥ ។
តាមប្រភពពីជនរងគ្រោះ បានឱ្យដឹងថា មុនពេលកើតហេតុរូបខ្លួនបានជិះម៉ូតូស្មាសវី ពណ៌ក្រហម មកដល់ចំណុចខាងលើបានឈប់ម៉ូតូនិយាយទូរស័ព្ទ ក៏ត្រូវជនសង្ស័យម្នាក់ស្លៀកកន្សែងដើរមកជិតហើយធ្វើ សកម្មភាពឆក់យកទូរស័ព្ទម៉ាកសាំសុង រួចរត់គេចខ្លួនបាត់ ។
ក្រោយពេលកើតហេតុនារីរងគ្រោះបានទូរស័ព្ទប្តឹងអាវុធហត្ថខណ្ឌចំការមន ចុះមកដល់ រុករក ក៏ចាប់បានជនសង្ស័យស្លៀកកន្សែងដែលជាអ្នកឆក់ទូរស័ព្ទរបស់រូបខ្លួន ដែលពួននៅក្បែរកន្លែងកើតហេតុ ។
ជនសង្ស័យបច្ចប្បន្ន ត្រូវបានកងអាវុធហត្ថខណ្ឌចំការមន ឃាត់ខ្លួនយកទៅសាកសួរកសាង សំណុំរឿងបញ្ជូនទៅអាវុធហត្ថរាជធានីភ្នំពេញ ៕ ស រស្មី
