ប្រជាជននៅឆ្នេរសមុទ្រភាគខាងកើតនៃប្រទេសអូស្ត្រាលីកំពុងទប់ទល់នឹងព្យុះស៊ីក្លូនត្រូពិច Alfred ដែលនាំមកនូវខ្យល់បក់ខ្លាំង ភ្លៀងជន់លិច និងរលកសមុទ្រធំៗនៅទីក្រុង Brisbane និង New South Wales។

យោងតាមទីភ្នាក់ងារសារព័ត៌មាន Reuters នៅថ្ងៃទី៥ ខែមីនា ឆ្នេរសមុទ្រភាគខាងកើតនៃប្រទេសអូស្ត្រាលីកំពុងរៀបចំជាបន្ទាន់ដើម្បីទប់ទល់នឹងព្យុះត្រូពិច Alfred ដែលរំពឹងថានឹងបោកបក់នៅដើមថ្ងៃទី ៧ ខែមីនា នៅជិតទីក្រុង Brisbane រដ្ឋធានីនៃរដ្ឋ Queensland ។
ព្យុះសង្ឃរា Alfred ត្រូវបានចាត់ថ្នាក់ជាព្យុះត្រូពិចប្រភេទទី 2 នៅលើមាត្រដ្ឋានកម្រិតប្រាំ ដែលមានសមត្ថភាពបង្កការខូចខាតយ៉ាងសំខាន់ដល់ដើមឈើ ផ្ទះសម្បែង ទូក និងហេដ្ឋារចនាសម្ព័ន្ធឆ្នេរសមុទ្រ។
ការិយាល័យឧតុនិយមអូស្ត្រាលីបានព្រមានថា ព្យុះនេះអាចនាំមកនូវខ្យល់បក់បោកក្នុងល្បឿន 155 គីឡូម៉ែត្រក្នុងមួយម៉ោង ភ្លៀងរាប់រយមីលីម៉ែត្រក្នុងរយៈពេលប្រាំមួយម៉ោង ទឹកទន្លេកើនឡើង និងរលកធំៗ។ ផ្ទះរាប់ពាន់ខ្នងក្នុងតំបន់ទាំងនេះប្រឈមនឹងគ្រោះទឹកជំនន់ធ្ងន់ធ្ងរ។
ទឹកជំនន់ដ៏ធំត្រូវបានព្យាករណ៍នៅលើដងទន្លេ Wilson ក្នុងទីក្រុង Lismore ជាកន្លែងដែលផ្ទះជាង 1,500 ត្រូវបានខូចខាតដោយទឹកជំនន់កាលពីឆ្នាំ 2022 ។ រដ្ឋាភិបាល Queensland បានបញ្ជាឱ្យមានការជម្លៀសជាចាំបាច់នៅក្នុងតំបន់មួយចំនួន និងបានណែនាំអ្នកស្រុកឱ្យត្រៀមខ្លួន។
អភិបាលរដ្ឋ Queensland លោក David Crisafulli បានសង្កត់ធ្ងន់ថា “ប្រសិនបើអ្នកត្រូវបានស្នើសុំឱ្យចាកចេញ ចូរចាកចេញជាបន្ទាន់” ៕

រូបថត​:The Guardian