ខេត្តកណ្តាល ៖ «ទិវាអំពើល្អ» នឹងធ្វើឡើងនៅថ្ងៃទី ៣-៤ ខែមេសា ២០២៥ នៅខេត្តកណ្តាល ដោយមានមនុស្សប្រមាណ១០ម៉ឺននាក់ ស្ម័គ្រចិត្តប្រមូលសំរាមតាមដងទន្លេ។
«ទិវាអំពើល្អ» ឆ្នាំ២០២៥ អង្គការសម្អាតទន្លេ សមុទ្រ បានសហការជាមួយរដ្ឋបាលខេត្តកណ្ដាល បន្តជំរុញ ពលរដ្ឋរស់នៅតាមដងទន្លេមេគង្គ ទន្លេសាប និងទន្លេចតុមុខ ចូលរួមស្រឡាញ់បរិស្ថាន ទុកសំរាមឱ្យបានត្រឹមត្រូវ ជាពិសេសកាត់បន្ថយការបំពុលទឹកពីប្លាស្ទិក។ នេះជាទង្វើដ៏ល្អ ខណៈប្រជាពលរដ្ឋយើងមានឆន្ទះចូលរួម ក្នុងស្មារតីជាតិនិយម ខ្មែរស្រឡាញ់ខ្មែរ ខ្មែររួបរួមជាតិ ស្រលាញ់ភាពស្អាតក្នុងសង្គម ។
ជាមួយគ្នានេះ លោក សុវណ្ណ នូ នាយកប្រតិបត្តិនៃ River Ocean Cleanup (ROC) លើកឡើងថា ៖ ព្រឹត្តិការណ៍នេះ ជាការរំលឹកដ៏មានអត្ថន័យ ពីសារៈសំខាន់នៃការចូលរួមសហគមន៍ក្នុងការបញ្ចៀសបញ្ហាប្លាស្ទិកក្នុងបរិស្ថានក្នុងទឹក លោក សុវណ្ណ នូ ស្នើរដល់សិស្សានុសិស្ស អាជីវកម្ម មន្ត្រីរាជការ និងប្រជាពលរដ្ឋទាំងអស់ ចូលរួមប្រមូលសំរាម ដើម្បី បង្កើតអនាគតកម្ពុជាស្អាតស្រស់បំព្រង គ្មានការបំពុល ជាពិសេសការបំពុលដោយប្លាស្ទិកទៅក្នុងទន្លេ។
«ទិវាអំពើល្អ» ធ្វើឡើងក្នុងគោលបំណងអភិរក្សបរិស្ថាន និងដោះស្រាយបញ្ហាសំរាម ជាពិសេសសំរាមប្លាស្ទីក និងផលប៉ះពាល់នានាដែលនាំឱ្យបំពុលទឹកទន្លេ។ ក្នុងព្រឹត្តិការណ៍នេះ នឹងមានសកម្មភាព ដូចជា សម្អាតទន្លេ, ប្រលែងត្រី , ដាំចែកដើមឈើនិងរុក្ខជាតិជាដើម។
ជាមួយគ្នានេះ ចាប់ពីឆ្នាំ ២០២០ ដល់ឆ្នាំ២០២៥នេះ អង្គការសំអាតទន្លេ សមុទ្រ បានប្រមូល សំរាមប្លាស្ទិកជាង ២ ០០០ តោននៅតាមដងទន្លេធំៗរបស់កម្ពុជា ដូចជា ទន្លេមេគង្គ ទន្លេសាប និងទន្លេបាសាក់ជាដើម។ ដោយឡែក «ទិវាអំពើល្អឆ្នាំ ២០២៥» អង្គការសំអាតទន្លេ សមុទ្រ បន្តលើកទឹកចិត្តពលរដ្ឋគ្រប់គ្រងសំណល់ប្លាស្ទិកឱ្យបានត្រឹមត្រូវ ដើម្បីអភិរក្សធនធានធម្មជាតិ។
សូមរំលឹកថា «ទិវាអំពើល្អ» បានចាប់ផ្តើមនៅឆ្នាំ២០២០មកម្ល៉េះ។ ក្រៅពីនេះ ទិវាអំពើល្អ (Good Deeds Day) ធ្វើជារៀងរាល់ឆ្នាំ និងមានអ្នកស្ម័គ្រចិត្តជាច្រើន ចូលរួមធ្វើអំពើល្អ តាមរយៈប្រមូលសំរាមតាមដងទន្លេនេះ។
សូមបញ្ជាក់ថា ៖ «បរិស្ថានជាបញ្ហារួមរបស់យើងទាំងអស់គ្នា ហើយទាមទារចាំបាច់នូវការចូលរួមរបស់យើងទាំងអស់គ្នាក្នុងការថែរក្សាអនាម័យបរិស្ថានជុំវិញខ្លួនយើងឱ្យបានល្អស្អាត បង្កើតបរិយាកាសល្អ និងមានផាសុកភាព សម្រាប់ការរស់នៅរស់យើង។ សង្គមកម្ពុជាមាន បរិស្ថានស្អាត និងមានភពបៃតងគឺកើតចេញពីពលរដ្ឋកម្ពុជាម្នាក់ៗចូលរួមក្នុងសកម្មភពបរិស្ថាន មានមេត្រីភាពបរិស្ថានប្រកបដោយ ការទទួលខុសត្រូវ និងដោយស្មារតីស្រឡាញ់បរិស្ថានខ្ពស់»៕
ដោយ ៖ សិលា
