ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញអនុក្រឹត្យ ស្តីពីអត្តសញ្ញាណបណ្ណសញ្ជាតិខ្មែរ។ អនុក្រឹត្យនេះមានបំណង កំណត់អំពីទម្រង់ និងព័ត៌មានដែលមាននៅក្នុងបញ្ជីអត្តសញ្ញាណបណ្ណសញ្ជាតិខ្មែរ និង ទម្រង់ លក្ខណៈសម្គាល់ ព័ត៌មាន ការកំណត់សុពលភាព និងការកំណត់អាយុត្រូវផ្តល់អត្តសញ្ញាណបណ្ណ សញ្ជាតិខ្មែរ ក្នុងគោលបំណងដើម្បីធានាការ ចុះបញ្ជីអត្តសញ្ញាណបណ្ណសញ្ជាតិខ្មែរឱ្យបានត្រឹមត្រូវ ស្របតាម គោលការណ៍កំណត់នៅក្នុងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

-អនុក្រឹត្យនេះកំណត់អំពីទម្រង់ និងព័ត៌មានដែលមាននៅក្នុងបញ្ជីអត្តសញ្ញាណបណ្ណសញ្ជាតិខ្មែរ និង ទម្រង់ លក្ខណៈសម្គាល់ ព័ត៌មាន ការកំណត់សុពលភាព និងការកំណត់អាយុត្រូវផ្តល់អត្តសញ្ញាណបណ្ណ សញ្ជាតិខ្មែរ ក្នុងគោលបំណងដើម្បីធានាការចុះបញ្ជីអត្តសញ្ញាណបណ្ណសញ្ជាតិខ្មែរឱ្យបានត្រឹមត្រូវ ស្របតាម គោលការណ៍កំណត់នៅក្នុងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

-អនុក្រឹត្យនេះ មានវិសាលភាពអនុវត្តចំពោះការចុះបញ្ជីអត្តសញ្ញាណបណ្ណសញ្ជាតិខ្មែរ សម្រាប់បុគ្គល គ្រប់រូបដែលមានសញ្ជាតិខ្មែរ។
-វាក្យសព្ទសំខាន់ៗដែលប្រើក្នុងអនុក្រឹត្យនេះ ត្រូវបានកំណត់និយមន័យ ដូចតទៅ៖

១- អត្តសញ្ញាណបណ្ណសញ្ជាតិខ្មែរ សំដៅដល់ឯកសារផ្លូវការមួយសម្រាប់បញ្ជាក់អំពីអត្តសញ្ញាណ បុគ្គលទាំងឡាយណាដែលមានសញ្ជាតិខ្មែរ។

២- ព័ត៌មានជីវមាត្រ សំដៅដល់ការវាស់ស្ទង់លក្ខណៈជីវសាស្ត្រ និងលក្ខណៈផ្សេងទៀត មានជាអាទិ៍ ស្នាមខ្មៅដៃ ប្រស្រីភ្នែក មុខ ហត្ថលេខា ឬសំឡេង ដែលអាចប្រមូលបានដោយឌីជីថល និងត្រូវបានប្រើប្រាស់ សម្រាប់កំណត់អត្តសញ្ញាណរបស់បុគ្គលម្នាក់ៗ។
៣- លេខអត្តសញ្ញាណបណ្ណសញ្ជាតិខ្មែរ សំដៅដល់លេខសម្គាល់លើសន្លឹកអត្តសញ្ញាណបណ្ណ សញ្ជាតិខ្មែរដែលផ្តល់ឱ្យប្រជាពលរដ្ឋខ្មែរម្នាក់ៗតាមលំដាប់ នៅពេលស្នើសុំចុះបញ្ជីអត្តសញ្ញាណបណ្ណសញ្ជាតិ ខ្មែរដំបូង ឬស្នើសុំផ្តល់ថ្មីឡើងវិញ ក្នុងករណីខូចខាត ឬបាត់បង់ ឬអស់សុពលភាព ឬកែតម្រូវទិន្នន័យ។
៤- កូដឆ្លើយតបរហ័ស (QR Code) សំដៅដល់សញ្ញាមានរាងបួនជ្រុង ដែលអាចអានបានដោយ ឧបករណ៍អេឡិចត្រូនិក ឬទូរសព្ទដៃ ដើម្បីបង្ហាញព័ត៌មានផ្សេងៗ។
៥- លេខកូដសម្គាល់អត្តសញ្ញាណបុគ្គល សំដៅដល់លេខកូដសម្រាប់សម្គាល់របស់បុគ្គលម្នាក់ៗ។ លេខកូដនេះត្រូវបានផ្តល់ជូនបុគ្គលម្នាក់ៗជាអចិន្ត្រៃយ៍ សម្រាប់ប្រើប្រាស់រហូតដល់បុគ្គលនោះទទួលមរណភាព។
៦- អត្តសញ្ញាណបណ្ណសញ្ជាតិខ្មែរទុតិយតា សំដៅដល់អត្តសញ្ញាណបណ្ណសញ្ជាតិខ្មែរដែលផ្តល់ថ្មី ឡើងវិញ ក្នុងករណីអត្តសញ្ញាណបណ្ណនោះមានការខូចខាត ឬបាត់បង់ ឬអស់សុពលភាព ឬកែតម្រូវទិន្នន័យ។
៧- អត្តសញ្ញាណឌីជីថលបុគ្គល សំដៅដល់ព័ត៌មានដែលបញ្ជាក់អត្តសញ្ញាណបុគ្គលក្នុងពិភពឌីជីថល ដែលព័ត៌មាននេះបានភ្ជាប់ទៅនឹងអត្តសញ្ញាណបុគ្គលក្នុងពិភពពិត៕

ដោយ ៖ សិលា