ខេត្តកំពង់ស្ពឺ ៖ បុរសម្នាក់ត្រូវបានកម្លាំងនគរបាលស្រុកបសេដ្ឋឃាត់ខ្លួន ខណៈដែលទប់កំហឹងមិនជាប់រឿងជនរងគ្រោះមិនឱ្យជំពាក់លុយទិញត្រី ហើយកើតចិត្តខឹងក៏ស្ទុះទាញកាំបិតផ្គាក់កាប់ដើមឈើជាប់របង និងគំរាម
កំហែងទៅលើជនរងគ្រោះថែមទៀត ដោយទ្រាំនឹងទង្វើរនេះមិនបានក៏ប្តឹងនគរបាលឃាត់តែម្តង ។
ការឃាត់ខ្លួនបុរសចិត្តខ្លាំងទាញកាំបិតផ្គាក់គំរាមកំហែង និងកាប់ដើមឈើនេះ កាលពីល្ងាចថ្ងៃទី៧ ខែមេសា ឆ្នាំ២០២៥ ស្ថិតនៅក្នុងភូមិទួល ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ ។
មន្ត្រីនគរបាលស្រុកបសេដ្ឋ បានឱ្យដឹងថា ជនសង្ស័យដែលនគរបាលឃាត់ខ្លួនមានឈ្មោះ សូវ សុខា ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅក្នុងភូមិទួល ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ ។
ចំណែកជនរងគ្រោះឈ្មោះ អន ពេទ្យ ភេទប្រុស អាយុ៣០ឆ្នាំ រស់នៅក្នុងភូមិទួល ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ ។
នគរបាលស្រុកបសេដ្ឋប្រាប់ឱ្យដឹងថា មុនពេលឈាន ដល់ការឃាត់ខ្លួនជនសង្ស័យខាងលើនេះ កាលពីវេលាម៉ោង៥ល្ងាច ថ្ងៃទី៦ ខែមេសា ឆ្នាំ២០២៥ ជនសង្ស័យឈ្មោះ សូវ សុខា ភេទប្រុស អាយុ២៣ឆ្នាំ រស់នៅក្នុងភូមិទួល ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ បានធ្វើសកម្មភាពកាន់កាំបិតផ្គាក់ និងដែកមុតស្រួច ប្រវែងប្រហែល២តឹក ហើយបានដើរទៅមុខផ្ទះរបស់ជនរងគ្រោះឈ្មោះ អន ពេទ្យ ភេទប្រុស អាយុ៣០ឆ្នាំ រស់នៅភូមិ-ឃុំជាមួយគ្នា ហើយក៏ជេរប្រមាថ និងបានយកដុំថ្មគប់មាន់ ថែមទាំងបានទាញយកកាំបិតផ្គាក់ទៅកាប់ដើមឈើជាប់របងផ្ទះរបស់ជនរងគ្រោះឈ្មោះ(អន ពេទ្យ) បណ្តាលឱ្យមានការភ័យខ្លាច ក្រោយពីធ្វើសកម្មភាពរួច ជនសង្ស័យបានគេចខ្លួនបាត់ ។
នគរបាលស្រុកបសេដ្ឋបានបន្តថា លុះដល់ព្រឹកថ្ងៃទី៧ ខែមេសា ឆ្នាំ២០២៥ ឈ្មោះ អន ពេទ្យ ក៏បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឃុំស្វាយរំពារ សុំឱ្យជួយអន្តរាគមន៍រកយុត្តិធម៌ ។ ក្រោយពីទទួលពាក្យបណ្តឹងពីជនរងគ្រោះរួចមក កម្លាំងនគរបាលជំនាញព្រហ្មទណ្ឌស្រុកបានសហការជាមួយប៉ុស្តិ៍ស្វាយរំពារចុះដល់កន្លែងកើតហេតុ ពិនិត្យ និងកសាងសំណុំរឿង និងស្វែងរកជនសង្ស័យឈ្មោះសូវ សុខា នៅវេលាម៉ោង៦ល្ងាចឈានដល់ធ្វើការឃាត់ខ្លួនជនសង្ស័យយកមកសួរនាំនៅអធិការដ្ឋានស្រុកបសេដ្ឋតែម្តង ។
បើតាមចម្លើយសារភាពរបស់ជនសង្ស័យឈ្មោះ សូវ សុខា ថា ខ្លួនពិតជាបានធ្វើសកម្មភាពកាន់កាំបិតផ្គាក់ និងដែកមុតស្រួចយកគំរាមកំហែងទៅលើជនរងគ្រោះពិតប្រាកដមែន ។
មូលហេតុនោះ គឺដោយសារតែរូបគេ (ជនសង្ស័យ) បានខឹងជនរងគ្រោះមិនឱ្យរូបគេជំពាក់លុយទិញត្រី ។
នគរបាលស្រុកបានបញ្ជាក់ថា ចំពោះជនសង្ស័យឈ្មោះ សូវ សុខា ជាមនុស្សមានចរិតកាចសាហាវប្រើប្រាស់គ្រឿងញៀញនតែងតែបង្កការអុកឡុកក្នុងមូលដ្ឋានជាញឹកញាប់ និងធ្លាប់ធ្វើកិច្ចសន្យា០១លើករួចមកហើយ តែពុំរាងចាល ។
បច្ចុប្បន្ន ជនសង្ស័យ រួម និងវត្ថុតាងកាំបិតផ្គាក់ត្រូវបានកសាងសំណុំរឿងចាត់ការបន្តតាមផ្លូវច្បាប់ ៕
