ខេត្តកំពត÷ យ៉ាងហោចណាស់បុរសចំនួន៣នាក់បានទទួលរងរបួសធ្ងន់ធ្ងរ និងអូប័រចំនួន២គ្រឿងត្រូវបានបំផ្លាញ ដោយសារតែអគ្គិភ័យ នៅវេលា​ម៉ោង​ ជាង៤រសៀល ​កាលពីថ្ងៃអាទិត្យ ទី១៣ ខែមេសា ឆ្នាំ២០២៥។

នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានឱ្យដឹងនាថ្ងៃចន្ទ ទី១៤ ខែមេសានេះថា ករណីអគ្គិភ័យឆាបឆេះអូប័រមួយកន្លែងនេះ បានកើតឡើងនៅចំណុចភោជនីយដ្ឋាន ហេងរស្មី ដែល​ស្ថិតនៅភូមិទ្វីខាងជើង សង្កាត់អណ្តូងខ្មែរ ក្រុង​ កំពត ខេត្តកំពត។

ជនរងគ្រោះទាំង៣នាក់នោះរួមមានឈ្មោះ​ យូ​ សុះ អាយុ​ ៤០​ ឆ្នាំ រស់នៅភូមិសុវណ្ណសាគរ សង្កាត់​ កណ្តាល ក្រុងកំពត, ឈ្មោះ ជិន​ រត្ន័ធី អាយុ​ ៣៥​ ឆ្នាំ រស់នៅភូមិទ្វីខាងត្បូង សង្កាត់​ អណ្តូងខ្មែរ ក្រុងកំពត និង ឈ្មោះ ផន ភក្តី អាយុ​ ២៩​ ឆ្នាំ រស់នៅភូមិអណ្តូងខ្មែរ សង្កាត់​ អណ្តូងខ្មែរ ក្រុងកំពត។

មូលហេតុ​ ដែលបណ្តាលឱ្យកើតមានអគ្គិភ័យនេះ គឺដោយសារតែជាងជួសជុលម៉ាស៊ីនបូមសាំង ដោយដោះយកមកសំអាតរ៉េសាវ័រ ហើយក៏បណ្តាលឱ្យ​មានការឆាបឆេះកើតឡើង។

កម្លាំងការិយាល័យបង្ការពន្លត់អគ្គិភ័យនិងសង្គ្រោះ​ នៃស្នងការដ្ឋាននគរបាលខេត្តកំពត​ បានចេញ​ប្រតិបត្តិការ​ពន្លត់ ដោយប្រើប្រាស់រថយន្តពន្លត់អគ្គិភ័យ ចំនួន២គ្រឿង។ ក្នុងនោះ បានប្រើប្រាស់​ទឹកអស់ចំនួន៦​ រថយន្ត​។ អគ្គិភ័យបានរលត់ទាំងស្រុងនៅវេលាម៉ោង ៧ និង១៥​ នាទីយប់​ នាថ្ងៃ​ដដែលនោះ៕