ខេត្តកំពត ៖ «អ្នកនាំពាក្យក្បាលទំពែក និយាយគ្មានមូលដ្ឋានការពិត» សម្ដេច ហ៊ុន ម៉ាណែត នាយករដ្ឋមន្ត្រី នៃកម្ពុជា ហៅលោក គឹម សុខ ដែលទទួលបានការតែងតាំងពីទណ្ឌិត សម រង្ស៊ី ជាអ្នកនាំពាក្យចលនាតស៊ូនៅក្រៅប្រទេស បែបនេះ បន្ទាប់ពីលោក គឹម សុខ និយាយរឿងព្រែកជីកហ្វូណនផ្ទុយពីការពិត។
សម្ដេចធិបតី នាយករដ្ឋមន្រ្ដីថ្លែងថា ៖ កម្ពុជាបើរវល់តែឆ្លើយតបទៅលើការវាយប្រហារដោយគ្មានមូលដ្ឋាន របស់ក្រុមជ្រុលនិយមមួយក្ដាប់តូចនៅក្រៅប្រទេសនោះគឺមិនអាចដើរទៅដល់គោលដៅទេ ប៉ុន្ដែយើងត្រូវខិតខំបន្តធ្វើ កសាង និងអភិវឌ្ឍន៍ប្រទេសជាតិ។
ប្រមុខរាជរដ្ឋាភិបាល អះអាងថា ត្បិតរដ្ឋាភិបាលរាប់អានជិតស្និទ្ធជាមួយចិន តែកម្ពុជា មិនចោលប្រទេសណាមួយឡើយ ពោលកម្ពុជារាប់អានគ្រប់ប្រទេសទាំងអស់។
ឈប់និយាយពាក្យថា ចិនចោលរដ្ឋាភិបាលកម្ពុជាតទៅទៀត ព្រោះដំណើររបស់លោកស៊ី ជីនពីង មកកម្ពុជា បញ្ជាក់ច្បាស់ គ្មានអ្វីគួរឱ្យស្រពេចស្រពិលឡើយ។ សម្ដេចធិបតី ប្រាប់ក្រុមមាននិន្នាការប្រឆាំងនៅក្រៅប្រទេសបែបនេះ។
សម្ដេចធិបតីនាយករដ្ឋមន្រ្ដីលើកឡើងថា ៖ ប្រជាពលរដ្ឋយើងគួរតែមានមោទនភាព ខណៈប្រទេសយើងជាប្រទេសតូចដែលមានទំនាក់ទំនងល្អជាមួយប្រទេសចិនដែលជាប្រទេសមហាអំណាចមួយនៅលើពិភពលោក។ តាមរយៈដំណើរទស្សនកិច្ចរបស់លោក ស៊ី ជីនពីង ប្រធានាធិបតីចិនមកកាន់កម្ពុជា គឺបង្ហាញកាន់តែច្បាស់អំពីទំនាក់ទំនងរឹងមាំរវាងកម្ពុជា និងចិន ៕
ដោយ ៖ សិលា
