ខេត្តកំពង់ចាម៖ នៅព្រឹកថ្ងៃទី ២៤ ខែ សីហា ឆ្នាំ២០១៦ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញទៅត្រួតពិនិត្យស្ថានភាពអនុវិទ្យាល័យ បឹងកុក និងសាកសួរសុខទុក្ខគ្រូបង្រៀន និងសិស្សានុសិស្ស ស្ថិតក្នុងក្រុងកំពង់ចាម ខេត្តកំពង់ចាម ។
ក្រោយពីបានពិនិត្យអាគារសិក្សាដែលមានសភាពចាស់ទ្រុតទ្រោម និងក្រោយពីបានស្តាប់យោបល់ និងកង្វល់លោកគ្រូអ្នកគ្រូ និងក្មួយៗសិស្សានុសិស្សរួចមក សម្តេចតេជោ ហ៊ុន សែន និងសប្បុរសជន បានធ្វើអំណោយអាគារសិក្សាថ្មី១ខ្នង ៣ជាន់ ១៨ បន្ទប់ ដោយវាយអាគារសាលាចាស់នេះចេញ និងសាងសង់ទីចាត់ការ១ខ្នង៣បន្ទប់ និងរៀចំអោយមានជាសាលសហសិក្សាថែមទៀតផង។ ទន្ទឹមនឹងនោះ នឹងមានរៀបចំអោយមានតារាងបាលទះ និងបាលទាត់សម្រាប់កូនក្មួយសិស្សានុសិស្សផងដែរ។
សម្តេចក៏បានអំពាវនាវដល់ក្មួយៗ និងចៅៗទាំងអស់ខិតខំសិក្សាធ្វើជាកូនល្អ និងពលរដ្ឋល្អរបស់ប្រទេសជាតិ ហើយត្រូវចៀសចេញអោយឆ្ងាយពីគ្រឿងញៀនគ្រប់ប្រភេទ និងអំពើអបាយមុខគ្រប់យ៉ាង។ ហើយសម្តេចក៏បានអគុណដល់លោកគ្រូអ្នកគ្រូដែលបានយកចិត្តទុកដាក់ពង្រឹងគុណភាពអប់រំអោយកាន់តែមានប្រសិទ្ឋិភាពល្អប្រសើរនៅតាមបណ្តាខេត្តទូទាំងប្រទេស៕
ដោយ៖ សុខ ខេមរា
