គណបក្សពលករជនជាតិឃឺដ ដែលបានប្រយុទ្ធជាមួយរដ្ឋតួកគីអស់រយៈពេលជាងបួនទសវត្សរ៍មកហើយនោះ បានសម្រេចរំសាយ និងបញ្ចប់ការតស៊ូប្រដាប់អាវុធរបស់ខ្លួន។

ទីភ្នាក់ងារសារព័ត៌មាន ANF ដែលគាំទ្រជនជាតិឃឺដ បានដកស្រង់សម្តីក្រុមនេះ ដែលបាននិយាយនៅក្នុងសេចក្តីថ្លែងការណ៍នៅថ្ងៃនេះថា “សមាជលើកទី 12 នៃគណបក្សពលករឃឺដ (PKK) បានសម្រេចចិត្តរំលាយរចនាសម្ព័ន្ធអង្គការរបស់ PKK និងបញ្ចប់វិធីសាស្រ្តតស៊ូប្រដាប់អាវុធ” ។
PKK អះអាងថា ខ្លួនបាននាំយកបញ្ហាឃឺដមកផ្តោតការយកចិត្តទុកដាក់ «ដល់ចំណុចដែលត្រូវដោះស្រាយតាមរយៈនយោបាយប្រជាធិបតេយ្យ» ហើយថាឥឡូវនេះ «បានបំពេញបេសកកម្មជាប្រវត្តិសាស្ត្រ»។
សមាជ PKK បានធ្វើឡើងកាលពីសប្តាហ៍មុននៅភាគខាងជើងប្រទេសអ៊ីរ៉ាក់ ហើយការសម្រេចចិត្តនេះត្រូវបានធ្វើឡើងនៅក្នុងសេចក្តីថ្លែងការណ៍បិទសមាជ។
ស្ថាបនិក PKK លោក Abdullah Ocalan ដែលជាប់គុកនៅកោះ Istanbul ប្រទេស Türkiye តាំងពីឆ្នាំ 1999 បានអំពាវនាវកាលពីខែកុម្ភៈ ឱ្យក្រុមនេះដកហូតអាវុធ និងរំសាយ។ ក្នុងលិខិតនោះ លោក Ocalan បានជំរុញឱ្យគណបក្សធ្វើសមាជដើម្បីធ្វើការសម្រេចជាផ្លូវការ។
ការសម្រេចចិត្តរបស់ PKK នឹងមានផលវិបាកផ្នែកនយោបាយ និងសន្តិសុខយ៉ាងទូលំទូលាយសម្រាប់តំបន់ រួមទាំងប្រទេសជិតខាងស៊ីរី ដែលកងកម្លាំងឃឺដជាសម្ព័ន្ធមិត្តជាមួយកងកម្លាំងអាមេរិក។
ការិយាល័យរបស់ប្រធានាធិបតីទួរគី Recep Tayyip Erdogan និងក្រសួងការបរទេសរបស់ប្រទេសនេះ មិនទាន់ធ្វើអត្ថាធិប្បាយលើព័ត៌មានខាងលើនៅឡើយទេ។
នៅក្នុងសុន្ទរកថាមួយកាលពីថ្ងៃទី 10 ខែឧសភា ប្រធានាធិបតី Erdogan បានបង្កប់ន័យថា ដំណឹងនៃការរំលាយគណបក្ស PKK អាចកើតឡើងនៅពេលណាក៏បាន ដោយបន្ថែមថា រដ្ឋាភិបាលរបស់លោកបានប្តេជ្ញាចិត្ត “ជួយសង្គ្រោះប្រទេសពីការគំរាមកំហែងនៃអំពើភេរវកម្ម” ៕

រូបថត​: AFP