ភ្នំពេញ៖ បុរសម្នាក់ជិះម៉ូតូលឿន មកដល់ចំណុចគល់ស្ពានអាកាសចោមចៅ បានជ្រុលទៅបុកបង្កាន់ដៃស្ពានបណ្តាលឲ្យស្លាប់ភ្លាមៗនៅកន្លែងកើតហេតុ ។
ហេតុការណ៍នេះបានកេីតឡើងកាលពីវេលាម៉ោង៧និង៣០នាទីយប់ថ្ងៃទី១៤ខែឧសភាឆ្នាំ២០២៥នៅផ្លូវសហព័ន្ធរុស្ស៊ី គល់ស្ពានអាកាសចោមចៅ ដែលស្ថិតនៅ ក្នុងភូមិព្រៃជីសាក់ សង្កាត់ចោមចៅទី៣ ខណ្ឌសែនសុខ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុគេឃើញជនរងគ្រោះជិះម៉ូតូម៉ាកនិចពណ៌សលាយលឿង ពាក់ស្លាកលេខព្រៃវែង 1Y-8842 ធ្វេីដំណើរតាមបណ្ដោយផ្លូវសហព័ន្ធរុស្ស៊ីក្នុងទិសដៅពីជើងទៅត្បូងក្នុងល្បឿនយ៉ាងលឿន លុះមកដល់ចំណុចកើតហេតុនៅច្រមុះជ្រូកស្ពានអាកាសចោមចៅផ្លូវបំបែកជាពីរ មួយធ្វេីដំណើរទៅផ្លូវជាតិលេខ៤ និងមួយទៀតទៅផ្លូវជាតិលេខ៣ តែជនរងគ្រោះបេីកលឿនពេកបានជ្រុលទៅបុកខឿននិងបង្កាន់ដៃស្ពានអាកាសចោមចៅ បណ្តាលឲ្យស្លាប់ភ្លាមៗនៅនឹងកន្លែងកើតហេតុ។
ប្រភពព័ត៌មានពីកន្លែងកើតហេតុបានបន្តទៀតថា ខណៈពេលម៉ូតូជនរងគ្រោះខ្ទាតទៅកណ្តាលផ្លូវ ក៏ត្រូវបានរថយន្តមិនស្គាល់ម៉ាកបានបើកបុកម៉ូតូជនរងគ្រោះបន្ថែមទៀតបណ្តាលឲ្យរងការខូចខាតផ្នែកខាងក្រោយយ៉ាងធ្ងន់ធ្ងរ ។
បើតាមប្រជាពលរដ្ឋខ្លះនិយាយថាសង្ស័យជារថយន្តបើកបុកពីក្រោយបណ្តាលឲ្យជនរងគ្រោះខ្ទាតទៅបុកខឿនបង្កាន់ដៃបណ្ដាលឲ្យស្លាប់បែបនេះ។ ទោះជាយ៉ាងណា សមត្ថកិច្ចជំនាញនឹងស្រាវជ្រាវមើលតាមកាមេរ៉ាសុវត្ថិភាពនៅកន្លែងកើតហេតុ ដើម្បីចង់ដឹងថា តើជនរងគ្រោះស្លាប់ដោយជិះម៉ូតូបុកខឿនបង្កាន់ដៃស្ពានឬមានរថយន្តបើកបុកម៉ូតូជនរងគ្រោះ។
ក្រោយពេលកើតហេតុ ដោយសារមិនបានស្គាល់អត្តសញ្ញាណជនរងគ្រោះ សមត្ថកិច្ចនគរបាលប៉ុស្តិ៍បានទាក់ទងទៅសមត្ថកិច្ចជំនាញចរាចរណ៍ខណ្ឌពោធិ៍សែនជ័យដេីម្បីយកសពទៅតម្កល់នៅវត្តទឹកថ្លារង់ចាំសាច់ញាតិមកទទួលយកទៅធ្វើបុណ្យ។ ចំណែកម៉ូតូជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលចោមចៅទី៣សិនរង់ចាំប្រគល់អោយក្រុមគ្រួសារជនរងគ្រោះវិញ ៕ 
ដោយ៖ សុខាសែនជ័យ
