ភ្នំពេញ៖ នៅថ្ងៃទី២៥ ខែសីហា ឆ្នាំ២០១៦ វេលាម៉ោងប្រហែល១២និង៥០នាទីរំលងអាធ្រាត្រកម្លាំងនគរបាលប៉ុសិ៍ផ្សារដើមគរបានឃាត់ខ្លួនជនសសង្ស័យម្នាក់ ដោយធ្វើសកម្មភាពវាយប្លន់យកម៉ូតូ នៅចំណុចផ្លូវមុន្នីរ៉េត ក្រុម១៩ ភូមិ១០ សង្កាត់ផ្សារដើមគរ ខណ្ឌទួលគោក កាលពីថ្ងៃទី១៧ ខែសីហា ឆ្នាំ២០១៦វេលាម៉ោង១១យប់កន្លងទៅ។

សមត្ថកិច្ចបានឲ្យដឹងថា ជនសង្ស័យឈ្មោះ ពៅ យក្ស ហៅខ្វាន់ ភេទប្រុស អាយុ២២ មុខរបបនិងស្នាក់នៅមិនពិតប្រាកដ។ ចំណែកជនរងគ្រោះឈ្មោះអៀន វ៉ៃ ភេទប្រុស អាយុ២៣ មុខរបបជានិស្សិតឆ្នាំទី៤ ស្នាក់នៅផ្ទះលេខ១៩B ផ្លូវ២៧១ សង្កាត់ទឹកថ្លា ខណ្ឌសែនសុខ រាជធានីភ្នំពេញ។ រីឯសម្ភារបាត់បង់មាន ម៉ូតូមួយគ្រឿងម៉ាកស្មាក ពណ៌ខ្មៅ ស៊េរី២០១៤ ពាក់ស្លាកលេខភ្នំពេញ1CH-8396។

សមត្ថកិច្ចបានឲ្យដឹងទៀតថា ក្រោយពីចាប់ឃាត់ខ្លួនជនសង្ស័យខាងលើ សមត្ថកិច្ចចាប់យកវត្ថុតាងបាន ម៉ូតូ១គ្រឿងម៉ាកវីវា ពណ៌ខ្មៅ គ្មានស្លាកលេខ និងកូនកាំបិតចុងស្រួចមានស្រោម១។

តាមប្រភពពីសមត្ថកិច្ចខណ្ឌទួលគោកបានឲ្យដឹងថា នៅថ្ងៃទី១៧ ខែសីហា ឆ្នាំ២០១៦វេលាម៉ោង១១យប់ ជនរងគ្រោះខាងលើបានជិះម៉ូតូមកពីផឹកស៊ីជាមួយបង ដោយមានភាពស្រវឹង ពេលមកដល់កន្លែងកើតហេតុបានឈប់និយាយទូរស័ព្ទ ពេលនោះជនសង្ស័យខាងលើ បានមកគំរាម និងច្រានជនរងគ្រោះចេញពីម៉ូតូហើយបានយកម៉ូតូជនរងគ្រោះជិះទៅបាត់តែម្តង។ លុះមកដល់ថ្ងៃទី២៥ ខែសីហា ឆ្នាំ២០១៦វេលាម៉ោង១២និង៥០យប់ កម្លាំងនគរបាលប៉ុសិ៍ផ្សារដើមគរបានធ្វើការស្រាវជ្រាវឈានដល់ការឃាត់ខ្លួលជនសង្ស័យខាងលើតែម្ដង។

បច្ចុប្បន្នជនសង្ស័យរួមនឹងវត្ថុតាងកំពុងឃាត់ខ្លួនបណ្ដោះអាសន្ននៅអធិការនគរបាលខណ្ឌទួលគោក ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់៕

ដោយ៖ ស ដារ៉ា