ទីក្រុង Odate ប្រទេសជប៉ុនតែងតាំង ឆ្កែ Akita ជានាយកអាកាសយានដ្ឋាន

ចែករំលែក៖

មន្ត្រីទីក្រុង Odate បានតែងតាំងបងប្អូនឆ្កែ Akita ពីរក្បាល ជានាយកអាកាសយានដ្ឋាន Odate-Noshiro ក្នុងខេត្ត Akita ក្នុងកិច្ចខិតខំប្រឹងប្រែងដើម្បីទាក់ទាញការយកចិត្តទុកដាក់ចំពោះពូជឆ្កែនេះ។

លោក Ishida Kensuke អភិបាលក្រុង Odate និងជាប្រធានក្រុមប្រឹក្សាផ្សព្វផ្សាយប្រតិបត្តិការអាកាសយានដ្ឋាន Odate-Noshiro បានធ្វើពិធីមួយកាលពីថ្ងៃទី 18 ខែឧសភា ដើម្បីតែងតាំងសត្វឆ្កែ Akita ពីរក្បាលជានាយកព្រលានយន្តហោះ។
ពិធីតែងតាំងឆ្កែឈ្មោលឈ្មោះ Rensui និងឆ្កែញី Tsukika ទាំងពីរអាយុ 3 ឆ្នាំបានធ្វើឡើងនៅលើវាលស្មៅអាកាសយានដ្ឋានទាក់ទាញមនុស្សជាច្រើនដើម្បីអបអរសាទរ “នាយកថ្មី” និងថតរូបអនុស្សាវរីយ៍។
ក្នុងពិធីនោះ អភិបាលក្រុង Kensuke បានបង្ហាញពីការសម្រេចចិត្តតែងតាំងលោក Masato Chiba អាយុ 67 ឆ្នាំ ដែលជាម្ចាស់ឆ្កែពីរក្បាលនោះ។ “នាយកថ្មី” ទាំងពីរក្បាល ត្រូវបានផ្តល់ឱ្យនូវកន្សែងដែលត្រូវបានរចនាឡើងដោយផ្អែកលើឯកសណ្ឋានបុគ្គលិកព្រលានយន្តហោះ។
លោក Chiba បាននិយាយថា “ខ្ញុំសង្ឃឹមថា តាមរយៈព្រឹត្តិការណ៍នេះ មនុស្សកាន់តែច្រើននឹងយកចិត្តទុកដាក់ចំពោះសត្វឆ្កែ Akita រួមចំណែកក្នុងការស្ដារឡើងវិញនូវភាពរឹងមាំនៃតំបន់នេះ”។
សត្វឆ្កែមួយគូនេះមកពី “ភូមិឆ្កែ Akita” ដែលជាកន្លែងផ្លាស់ប្តូរភ្ញៀវទេសចរនៅក្នុងទីក្រុង Odate ខេត្ត Akita ។ ពួកគេធ្លាប់ចូលរួមក្នុងកម្មវិធីទទួលឆ្កែ Akita ដែលព្រលានយន្តហោះអនុវត្តនៅថ្ងៃទី 8 ជារៀងរាល់ខែ។
មន្ត្រី Odate បានតែងតាំងសត្វឆ្កែពីរក្បាលជានាយកអាកាសយានដ្ឋានដើម្បីប្រារព្ធខួប 10 ឆ្នាំនៃកម្មវិធីឆ្កែ Akita ដើម្បីស្វាគមន៍ភ្ញៀវទេសចរនៅព្រលានយន្តហោះ។
សត្វឆ្កែ Akita គឺជាពូជឆ្កែដែលមានដើមកំណើតពីខេត្ត Akita តំបន់ Tohoku ក្នុងប្រទេសជប៉ុន។ ពួកគេមានភាពស្ងប់ស្ងាត់ និងល្បីល្បាញដោយសារភាពស្មោះត្រង់ជាមួយនឹងរឿងដ៏ល្បីរបស់ឆ្កែ Hachiko ដែលរង់ចាំម្ចាស់របស់វាអស់រយៈពេល 9 ឆ្នាំនៅស្ថានីយ៍ Shibuya ៕ ដោយធីរីណា