ភ្នំពេញ ៖ បុរសម្នាក់បានផឹកស្រាថ្នាំស្រវឹងខ្លាំង ស្រាប់តែសម្រេចចិត្តចងកបញ្ចប់ជិវិតខ្លួនឯង ។ ហេតុការណ៍នេះបានបង្កឱ្យមានការភ្ញាក់ផ្អើលនៅវេលាម៉ោង០៦:០០នាទី ថ្ងៃទី២២ ខែឧសភា ឆ្នាំ២០២៥ ត្រង់ចំណុចឃ្លាំងស្តុកសម្ភារៈ សិប្បកម្មផលិតកាតុង ផ្លូវលំ ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
សពបុរសដែលបានចងកសម្លាប់ខ្លួនឯងខាងលើនេះមានឈ្មោះ ហេង សំអន ភេទប្រុស អាយុ២៧ឆ្នាំ មុខរបរកម្មករដុតឡ ស្នាក់នៅក្នុងសិប្បកម្មផលិតកាតុង ផ្លូវលំ ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។
យោងតាមការបំភ្លឺពីឈ្មោះ សុខ សុខុម ភេទប្រុស អាយុ៦២ឆ្នាំ បានរៀបរាប់ប្រាប់សមត្ថកិច្ចឱ្យដឹងថា: កាលពីថ្ងៃទី២១ ខែឧសភា ឆ្នាំ២០២៥ វេលាម៉ោងប្រហែល១៩និង០០នាទី ខ្ញុំបាទ(រូបគាត់) កំពុងនៅឃ្លាំងស្តុកសម្ភារៈ តាមផ្លូវលំ ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។ ពេលនោះរូបគាត់បានឃើញឈ្មោះ ហេង សំអន ភេទប្រុស អាយុ២៧ឆ្នាំ អង្គុយផឹកស្រាថ្នាំតែម្នាក់ឯង នៅលើគ្រែក្នុងឃ្លាំងស្តុកសម្ភារៈខាងលើ លុះដល់វេលាម៉ោងប្រហែល២២និង០០នាទី គាត់ក៏បានបិទទ្វារចាក់សោឃ្លាំង តែមិនឃើញឈ្មោះ ហេង សំអន នៅអង្គុយផឹកទៀតទេ មិនដឹងថាចេញទៅតាំងពីពេលណាឡើយ លុះដល់វេលាម៉ោង០៦និង០០នាទី ព្រឹកថ្ងៃទី២២ ខែឧសភា ឆ្នាំ២០២៥ គាត់បានក្រោកពីដេកឡើងទៅបើកទ្វារឃ្លាំង ស្រាប់តែឃើញឈ្មោះ ហេង សំអន បានចងកជាប់នឹងទ្វាររបងឃ្លាំងខាងលើស្លាប់បាត់ទៅហើយ ។
តាមការពិនិត្យនិងធ្វើកោសល្យវិច័យរបស់កម្លាំងការិយាល័យបច្ចេកទេសវិទ្យាសាស្រ្តនៃស្នងការដ្ឋាននគរបាលរាជធានីភ្នំពេញ និងលោកឧកញ៉ាវេជ្ជបណ្ឌិត នង សុវណ្ណារត្ន័ លោកគ្រូពេទ្យអមសាលាដំបូងរាជធានីភ្នំពេញបញ្ជាក់ថាជនរងគ្រោះស្លាប់ដោយសារចងក(អត្តឃាត)ពិតប្រាកដមែន។
សពសមត្ថកិច្ចបានធ្វើកំណត់ហេតុប្រគល់ទៅឱ្យក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត៕
ដោយ ៖ ភារ៉ា ដង្កោ
