ខេត្តកំពង់ស្ពឺ៖ ជនសង្ស័យម្នាក់ត្រូវបានសមត្ថកិច្ចឃាត់ខ្លួនខណៈបើកគោយន្តដែលលួចបានប្រុងយកទៅលក់កាលពីវេលាម៉ោង៣រសៀលថ្ងៃទី២៤ ខែសីហា ឆ្នាំ២០១៦ នៅភូមិព្រៃផ្តៅ ឃុំត្រពាំងជោ ស្រុកឱរ៉ាល់ ខេត្យកំពង់ស្ពឺ។

លោកវរសេនីយ៍ត្រី ប៑ុត ប៑ុនធឿន អធិការនគរបាលស្រុកឱរ៉ាល់ បានឲ្យដឹងនៅព្រឹកថ្ងៃទី២៦ ខែសីហា ឆ្នាំ២០១៦ ថាករណីចោរលួចគោយន្តនេះជនសង្ស័យឈ្មោះ តយ ភារម្យ ភេទប្រុស អាយុ១៩ឆ្នាំ មានទីលំនៅនិងមុខរបរមិនពិតប្រាដក ។

ក្រោយទទួលព័ត៌មានថា មានករណីចោរលួចគោយន្តរូបលោកបានធ្វើការតាមដានស្វែងរកជនសង្ស័យរូបនេះតែមិនឃើញនោះឡើយ ក្រោយមកស្រាប់តែទទួលបានព័ត៌មានថា នគរបាលក្រុងច្បារមន ឃាត់ខ្លួនជនសង្ស័យរូបនេះបានបាត់ទៅហើយ។

នៅចំពោះមុខសមត្ថកិច្ចជនសង្ស័យរូបនេះបានឆ្លើយសារភាពថា ក្រោយលួចយកគោយន្តរបស់អ្នកស្រុកដែលចតទុកនៅលើភ្លឺស្រែនៅចំណុចខាងលើបានហើយ រូបគេបានបើកគោយន្តមកដល់សង្កាត់កណ្តោលដុំ ក្រុងច្បារមន ប្រុងយកទៅលក់ក៏ត្រូវនគរបាលតាមទាន់ហើយធ្វើការឃាត់ខ្លួនបាមតែម្តង។ ក្រោយឃាត់ខ្លួនជនសង្ស័យត្រូវបានបញ្ជូនទៅស្រុកឱរ៉ាល់ វិញដើម្បីកសាងសំណុំរឿងបន្ត ។

លោកអធិការបានឲ្យដឹងទៀតថា នៅព្រឹកថ្ងៃទី២៦ ខែសីហា នេះក្រោយកសាងសំណុំរៀងរួចរាល់កម្លាំងរបស់លោកបានបញ្ជូនជននេះទៅកាន់ការិយាល័យកម្រិតស្រាលចាត់ការតាមនីតិវិធី។ ចំណែកគោយន្តសមត្ថកិច្ចបានប្រគល់ឲ្យម្ចាស់ដើមយកទៅប្រើប្រាស់វិញហើយ៕

ដោយ៖ សេនាស័ក្តិ