រថយន្តមួយគ្រឿងបានបើកបុកហ្វូងអ្នកគាំទ្រ Liverpool យ៉ាងច្រើនកុះកររាប់ម៉ឺននាក់ អំឡុងពេលក្បួនដង្ហែរអបអរការឈ្នះជើងឯក Premier League របស់ក្រុមខ្លួនកាលពីថ្ងៃចន្ទ ទី២៦ ខែឧសភា ដោយបានបញ្ជូនមនុស្សចំនួន ២៧នាក់ ទៅសម្រាកព្យាបាលនៅមន្ទីរពេទ្យ ហើយមនុស្សពីរនាក់បានរងរបួសធ្ងន់ ប៉ុន្តែប៉ូលិសបាននិយាយថា ពួកគេមិនជឿថា ឧបទ្ទវហេតុនេះពាក់ព័ន្ធនឹងអំពើភេរវកម្មនោះទេ។
ប៉ូលីសបាននិយាយថា ពួកគេបានចាប់ខ្លួន “បុរសជនជាតិអង់គ្លេសស្បែកសអាយុ 53 ឆ្នាំម្នាក់មកពីតំបន់ Liverpool” ដែលពួកគេជឿថាជាអ្នកបើករថយន្តដែលបានបុករះលើក្រុមអ្នកគាំទ្រជាច្រើនដែលកំពុងប្រារព្ធនៅទីក្រុងនៅភាគពាយព្យនៃប្រទេសអង់គ្លេស។
មនុស្ស 20 នាក់ត្រូវបានព្យាបាលនៅកន្លែងកើតហេតុ។ មន្ត្រីរថយន្តសង្គ្រោះបាននិយាយថា ក្នុងចំណោមអ្នកទាំង២៧នាក់ដែលត្រូវបានគេបញ្ជូនទៅមន្ទីរពេទ្យនោះ មាន៤នាក់ជាកុមារ ។ កុមារម្នាក់ និងមនុស្សពេញវ័យម្នាក់ស្ថិតក្នុងស្ថានភាពធ្ងន់ធ្ងរ។ មនុស្សបួននាក់ដែលជាប់នៅក្រោមរថយន្តត្រូវបានអ្នកពន្លត់អគ្គិភ័យរំដោះចេញ។ វីដេអូនៅលើប្រព័ន្ធផ្សព្វផ្សាយសង្គមបានបង្ហាញពីមនុស្សបានបោះទៅលើអាកាស ខណៈដែលរថយន្តបានបើកបុកអ្នកទស្សនា។ ពេលរថយន្តឈប់ អ្នកគាំទ្រខឹងសម្បាក៏នាំគ្នាវាយកញ្ចក់បង្អួច ខណៈមន្ត្រីប៉ូលិសជួយអន្តរាគមន៍រារាំងមិនឱ្យទៅដល់អ្នកបើកបរ ។
