តម្លៃមធ្យមនៃផ្ទះថ្មីនៅទូទាំងទីក្រុងចំនួន 100 ក្នុងប្រទេសចិនបានកើនឡើង 0.30 ភាគរយនៅក្នុងខែឧសភា ដែលបង្ហាញថាគោលនយោបាយគាំទ្រអាចផ្តល់លទ្ធផលមួយចំនួន នេះបើយោងតាមការស្ទង់មតិឯកជនដែលចេញផ្សាយដោយអ្នកស្រាវជ្រាវអចលនទ្រព្យ China Index Academy នៅថ្ងៃអាទិត្យនេះ (ថ្ងៃទី 1 ខែមិថុនា)។

 

ការកើនឡើងនេះគឺស្ទើរតែទ្វេដងនៃការកើនឡើងកាលពីខែមុនដែលមាន 0.14 ភាគរយ។

 

តម្លៃផ្ទះថ្មីបានស្ថិតក្រោមសម្ពាធ បើទោះបីជាអ្នកបង្កើតគោលនយោបាយចិនបានព្យាយាមប្រឹងប្រែងតាំងពីឆ្នាំមុន ដើម្បីរក្សាស្ថិរភាពក្នុងវិស័យនេះជាមួយនឹងវិធានការគាំទ្រ រួមទាំងការបញ្ចុះអត្រាការប្រាក់កម្ចីនាពេលថ្មីៗនេះ ដើម្បីជំរុញការទិញអចលនទ្រព្យ។

 

វិទ្យាស្ថានស្រាវជ្រាវអចលនទ្រព្យបាននិយាយនៅក្នុងរបាយការណ៍មួយដែលបានបង្ហោះនៅលើគណនី WeChat របស់ខ្លួនថា “សរុបមក ការគាំទ្រគោលនយោបាយម៉ាក្រូបច្ចុប្បន្នសម្រាប់ទីផ្សារអចលនទ្រព្យកំពុងកើនឡើង” ។

 

តម្លៃផ្ទះថ្មីនៅក្នុងទីក្រុងលំដាប់ទី 1 និងទី 2 ត្រូវបានស្ទង់មតិកើនឡើងពីមួយខែមុន ដោយទីក្រុងសៀងហៃបានឈរនៅលើកំពូលតារាងនៃទីក្រុងចំនួន 100 ។

 

ផ្អែកលើមូលដ្ឋានពីមួយឆ្នាំទៅមួយឆ្នាំ តម្លៃជាមធ្យមសម្រាប់ផ្ទះថ្មីបានកើនឡើងលឿនជាងនៅ 2.56 ភាគរយធៀបនឹង 2.50 ភាគរយនៅក្នុងខែមេសា។

ទន្ទឹមនឹងនេះគែសង្កេតឃើញថា

តម្លៃនៃអចលនទ្រព្យចាស់ដែលបានលក់ដូរហើយ(មួយទឹក) បានធ្លាក់ចុះ 0.71 ភាគរយធៀបនឹងខែមុន និង 7.24 ភាគរយពីមួយឆ្នាំទៅមួយឆ្នាំ។ នោះ​បើ​ធៀប​នឹង​ការ​ធ្លាក់​ចុះ​នៅ​ខែ​មេសា 0.69 ភាគរយ និង 7.23 ភាគរយ​រៀង​ខ្លួន។

 

សញ្ញានៃការធូរស្រាលនេះអាចជួយការពារសេដ្ឋកិច្ចរបស់ប្រទេសចិនពីភាពតានតឹងនៃសង្គ្រាមពាណិជ្ជកម្មដែលមិនទាន់ត្រូវបានដោះស្រាយជាមួយសហរដ្ឋអាមេរិក។