ភ្នំពេញ ៖ រាជរដ្ឋាភិបាលកម្ពុជា មានលទ្ធភាពគ្រប់គ្រាន់ក្នុងការផ្តត់ផ្គង់កងទ័ពនៅព្រំដែន ប៉ុន្តែការជួយគាំទ្រពីប្រជាពលរដ្ឋគ្រប់មជ្ឈដ្ឋាន គ្រប់ទីកន្លែង គឺជាការផ្តល់កម្លាំងចិត្តដ៏ធំធេងដល់កងទ័ព។
នៅចំពោះមុខភាពតានតឹងនៅព្រំដែនរវាងកម្ពុជា និងថៃ, ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ៖ រាជរដ្ឋាភិបាលកម្ពុជា មានលទ្ធភាពគ្រប់គ្រាន់ក្នុងការផ្តត់ផ្គង់កងទ័ពនៅព្រំដែន !
ការបញ្ជាក់បែបនេះ របស់សម្តេចបវរធិបតី ហ៊ុន ម៉ាណែត បានធ្វើឡើងនៅក្នុងឱកាសដែលសម្តេចអញ្ជើញថ្លែងជូនអង្គសមាជរដ្ឋសភា-ព្រឹទ្ធសភា លើបញ្ហាព្រំដែនរវាងកម្ពុជា-ថៃ នាព្រឹកថ្ងៃទី០២ ខែមិថុនា ឆ្នាំ២០២៥នេះ។
ជាមួយគ្នានេះដែរ សម្តេចបវរធិបតី ហ៊ុន ម៉ាណែត បានឱ្យដឹងថា នាថ្ងៃទី០១ ខែមិថុនា ឆ្នាំ២០២៥ ម្សិលមិញ សម្តេចបានចុះទៅជួបដោយផ្ទាល់ជាមួយមេទ័ព និងកម្លាំងទ័ពកម្ពុជា ដែលកំពុងឈរជើងនៅព្រំដែនខេត្តព្រះវិហារ ដោយកងទ័ពកម្ពុជាបានត្រៀមលក្ខណៈរួចជាស្រេចដើម្បីការពារទឹកដី បូរណភាពទឹកដីរបស់កម្ពុជា។ កម្ពុជា មិនមានបំណងឈ្លានពានចូលប្រទេសជិតខាង និងមិនចង់បានទឹកដីប្រទេសណាមួយសូម្បីតែមួយមីលីម៉ែត្រ។ ប៉ុន្តែ សូមប្តេជ្ញាចិត្តការពារឱ្យបានដាច់ខាតនូវអធិបតេយ្យភាព និងបូរណភាពទឹកដីរបស់កម្ពុជា ចំណុចនេះ គឺជាការរបស់កងទ័ព និងកងកម្លាំងនគរបាលជាតិកម្ពុជា ដែលកំពុងឈរជើងនៅតាមបន្ទាត់ព្រំដែន។
សម្តចបវរធិបតី ហ៊ុន ម៉ាណែត ក៏បាថ្លែងអំណរគុណចំពោះការគាំទ្រដ៏ផុសផុលពីបងប្អូនប្រជាពលរដ្ឋខ្មែរគ្រប់ទិសទី មិនថានៅក្នុងប្រទេស មិនថានៅក្រៅប្រទេសចំពោះការជួយឧបត្ថម្ភគាំទ្រទៅដល់កងទ័ពរបស់យើង កងនគរបាលជាតិ តាមរយៈការបរិច្ចាគធនធាន ថវិកា សម្ភារៈ ស្បៀងអាហារជាច្រើន ជាបន្តបន្ទាប់ ក៏ដូចជាការបញ្ចេញសារគាំទ្រលើបណ្តាញសង្គម និងតាមរយៈគ្រប់រូបភាពផ្សេងៗទៀត ដើម្បីផ្តល់កម្លាំងចិត្តដល់កងទ័ពរបស់កម្ពុជា ដែលឈរជើងនៅតាមបន្ទាត់ព្រំដែន។
សម្តចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា៖ «ខ្ញុំសូមបញ្ជាក់ថា ការជួយឧបត្ថម្ភមិនត្រឹមតែស្បៀង មិនត្រឹមតែថវិកានោះទេ ការធានាស្បៀង ការធានាថវិកា រាជរដ្ឋាភិបាលយើងបានធានា ក្រសួងការពារជាតិ ឯកឧត្តម ឧបនាយករដ្ឋមន្ត្រី ទៀ សីហា បានទៅឈរជើងនៅទីនោះ និងថ្នាក់ដឹកនាំក្រសួងការពារជាតិ ខាងភស្តុភាក្រសួងការពារជាតិ ក៏បានធានា យើងមិនឱ្យមានការខ្វះខាតសម្រាប់បងប្អូននោះទេ ប៉ុន្តែ ការជួយគាំទ្របន្ថែមរបស់បងប្អូនប្រជាពលរដ្ឋនេះ មិនត្រឹមតែជាស្បៀង សម្ភារៈ ប៉ុន្តែ គឺជាការលើកទឹកចិត្តសម្រាប់កងទ័ពរបស់យើង ដែលដឹងថាប្រជាពលរដ្ឋយើងនៅគ្រប់ទិសទីនៅពីក្រោយកងទ័ពរបស់យើង ដើម្បីបំពេញកាតព្វកិច្ចការពារទឹកដីរបស់យើងដោយបានជោគជ័យនេះ គឺជាសារធំណាស់សម្រាប់បងប្អូនរបស់យើង»។
បន្ថែមពីនេះ សម្តេចបវរធិបតី នាយករដ្ឋមន្ត្រី សូមអំពាវនាវបន្តគាំទ្រ និងរួមគ្នា ដើម្បីលើកទឹកចិត្តកងទ័ពកម្ពុជា ហើយនៅពេលជាមួយគ្នា និងសូមអំពាវនាវសារជាថ្មី ចំពោះបងប្អូនប្រជាពលរដ្ឋខ្មែរមួយចំនួនទោះបីជាមាននិន្នាការណាក៏ដោយសូមកុំធ្វើសកម្មភាពណាដែលប៉ះពាល់ដល់ទឹកចិត្តរបស់កម្ពុជា ពីព្រោះពេលនេះ ជាពេលវេលាដែលយើងជាខ្មែរត្រូវរួមគ្នា ដើម្បីត្រៀមលក្ខណៈការពារជាតិ ការពារបូរណភាពទឹកដី ជាពិសេសត្រូវរួមគ្នាឈរពីក្រោយកងទ័ពកម្ពុជា ដើម្បីការពារទឹកដី ឱ្យបានជាដាច់ខាត។
គួរឱ្យដឹងថា បន្ទាប់ពីការប៉ះទង្គិចគ្នារវាងកងទ័ពកម្ពុជា និងកងទ័ពនៅព្រំដែនតំបន់មុំបី ស្ថិតនៅខេត្តព្រះវិហារ ដែលបានកើតឡើងនាព្រឹក ថ្ងៃទី២៨ ខែឧសភា ឆ្នាំ២០២៥។ ហេតុការណ៍នេះ បានបណ្តាលឱ្យទាហានខ្មែរម្នាក់ ដែលឈរជើងនៅតំបន់មុំបីនេះ បានពលីជីវិត។ យោធិនរូបនោះមានឈ្មោះ សួន រ៉ោន អាយុ៤៨ឆ្នាំ តួនាទីព្រិន្ទបាលឯក មានទីលំនៅក្នុងភូមិកំពេញ ឃុំយាង ស្រុកជាំក្សាន្ត ខេត្តព្រះវិហារ។
មានការចូលរួមឧបត្ថម្ភថវិការបស់ក្រុមហ៊ុន ព្រមទាំងបងប្អូនប្រជាពលរដ្ឋនៅគ្រប់មជ្ឈដ្ឋាន ទាំងនេះគឺជាការចូលរួមចំណែកលើកទឹកចិត្ត ដល់កងទ័ពកម្ពុជាដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំ ដើម្បីការពារបូរណភាពទឹកដី នៅតាមបណ្តោយព្រំដែនកម្ពុជា-ថៃ ។
សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកថា ៖ កម្ពុជាប្រកាន់ជំហរដោះស្រាយបញ្ហាព្រំដែនដោយសន្តិវិធីតាមរយៈការប្រើប្រាស់យន្តការបច្ចេកទេស និងច្បាប់អន្តរជាតិ ជាគោល។ ក្នុងន័យនេះខ្ញុំបានបញ្ជាឲ្យគណៈកម្មការព្រំដែនចម្រុះ(JBC) កម្ពុជា ÷
១. រៀបចំការប្រជុំជាបន្ទាន់ជាមួយគណៈកម្មការព្រំដែនចម្រុះ(JBC) ជាមួយភាគីថៃ ដើម្បីបន្តការងារវាស់វែង ខណ្ឌសីមា និងបោះបង្គោលព្រំដែនរវាងប្រទេសទាំងពីរ។
២. ត្រៀមដាក់ចូលក្នុងរបៀបវារៈសម្រាប់កិច្ចប្រជុំJBC ពាក់ព័ន្ធនឹងការយកបញ្ហាប្រាសាទតាមាន់ធំ ប្រាសាទតាមាន់តូច និងតំបន់មុំបី ទៅតុលាការយុត្តិធម៌អន្តរជាតិ (ICJ) តែម្ដងដើម្បីពន្លត់ភ្លើងដែលកំពុងឆេះជុំវិញបញ្ហានេះ។
សម្តេចធិបតីថ្លែងយ៉ាងខ្លីថា ៖ «ទោះថៃ មិនព្រមឡើងទៅតុលាការ ICJ ក៏ដោយ តែកម្ពុជា នៅតែបន្តប្តឹងទៅ ICJ ដែរ ដើម្បីរំលត់ និងបញ្ចប់បញ្ហាព្រំដែនជាមួយថៃ។ នាយករដ្ឋមន្រ្តីកម្ពុជា ប្រកាសប្រើកម្លាំងប្រដាប់អាវុធការពារទឹកដី បើមានការប៉ុនប៉ងរំលោភអធិបតេយ្យកម្ពុជា ដោយប្រើកម្លាំងប្រដាប់អាវុធ! ៕
ដោយ ៖ សិលា
