ភ្នំពេញ៖ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី០៥ ខែមិថុនា ឆ្នាំ២០២៥នេះ បានថ្លែងថា៖ សូមជម្រាបជូនបងប្អូនដែលបានរងគ្រោះលើករណីនេះ សូមនាំគ្នាមកដាក់ពាក្យបណ្ដឹងនៅអធិការខណ្ឌ ឬដាក់មកស្នងការដ្ឋានរាជធានីភ្នំពេញ (ខ្ញុំចាត់វិធានការជូន)។
តាមរយៈបណ្ដាញសង្គមហ្វេសប៊ុកផ្លូវការរបស់លោកឧត្ដមសេនីយ៍ឯក ជួន ណារិន្ទ បានគូសបញ្ជាក់ថា៖ សូមបដិសេធលើការបង្ហោះព័ត៍មានថាជាសមត្ថកិច្ចខណ្ឌមានជ័យ ០៦នាក់កៀបស៊ីម៉ូតូ ប្រជាពលរដ្ឋពេលយប់ សូមបង្ហាញភ័ស្តុតាងជាក់លាក់ផង (ដែលធ្វើឱ្យប៉ះពាល់ដល់កត្តិយស សេចក្ដីថ្លៃថ្នូរ ដល់កម្លាំងយើងខ្ញុំ) មុនផ្សាយសូមប្រមូលព័ត៌មានឱ្យច្បាស់លាស់ ។
បន្ថែមពីនេះ លោកស្នងការនគរបាលរាជធានីភ្នំពេញ ក៏បានបញ្ជាក់ទៀតថា ក្រោយទទួលបានព័ត៌មាន លោកបានបញ្ជាឱ្យស្រាវជ្រាវ និងរកឃើញម៉ូតូ ចំនួន ០៣គ្រឿង យកមករក្សាទុកនៅអធិការខណ្ឌមានជ័យ ដើម្បីរកម្ចាស់មកទទួល និងដាក់ពាក្យបណ្ដឹងផង៕ដោយ៖តារា
