វិស័យធុរកិច្ចកំពុងជំរុញឱ្យមានដំណោះស្រាយដោយសន្តិវិធីចំពោះភាពតានតឹងព្រំដែនកម្ពុជា-ថៃ ដោយព្រមានថាការពន្យារពេលកំពុងធ្វើឱ្យប៉ះពាល់ដល់សេដ្ឋកិច្ចក្នុងស្រុក ជាពិសេសការនាំចេញផ្លែឈើរបស់ប្រទេសយ៉ាងខ្លាំង។

លោកស្រី Wipa Sunate ប្រធានសភាពាណិជ្ជកម្មខេត្តត្រាតកាលពីថ្ងៃសៅរ៍បាននិយាយថាខេត្តត្រាតភាគខាងកើតមានការធ្លាក់ចុះនូវទំនុកចិត្តរបស់វិនិយោគិន ហើយកំពុងប្រឈមមុខនឹងការធ្លាក់ចុះនៃសេដ្ឋកិច្ច។ អ្នកស្រីបន្តថា ការនាំចេញមកកម្ពុជាមានតម្លៃ៣០ពាន់លានបាត ខណៈការនាំចូលពីកម្ពុជាមានតម្លៃ៣ទៅ៤ពាន់លានបាត។

ទោះជាយ៉ាងណាក៏ដោយ ការរៀបចំពាណិជ្ជកម្មនេះកំពុងប្រឈមនឹងការធ្លាក់ចុះដោយសារតែអស្ថិរភាពនយោបាយ និងការរឹតបន្តឹងលើម៉ោងប្រតិបត្តិការនៅតាមព្រំដែន។ ការធ្លាក់ចុះនៃលំហូរផលិតផល និងការលក់នឹងប៉ះពាល់ដល់អាជីវកម្ម និងផលិតកម្មបន្ថែមទៀត ដោយលោកស្រីបន្ថែមថា ប្រសិនបើព្រំដែនត្រូវបិទជាអចិន្ត្រៃយ៍ ផលវិបាកនឹងកាន់តែធ្ងន់ធ្ងរ។

លោកស្រី Wipa បានបន្ថែមថា កសិករដាំផ្លែឈើនៅខេត្តត្រាត មិនអាចនាំចេញផលិតផលរបស់ពួកគេមកកម្ពុជាបានទេ ដោយសារការហាមឃាត់ការដឹកជញ្ជូនផ្លែឈើឆ្លងកាត់ព្រំដែន។ លោកស្រីបន្តថា វិស័យទេសចរណ៍ក៏រងផលប៉ះពាល់ដែរ ខណៈអ្នកធ្វើដំណើរប្រឈមនឹងការរឹតត្បិតចូលមកកម្ពុជា។ លោកស្រីបន្តថា សភាគ្រោងនឹងលើកបញ្ហាទាំងនេះជាមួយសភាពាណិជ្ជកម្មថៃ ដើម្បីជំរុញឱ្យរដ្ឋាភិបាលចាត់វិធានការទប់ស្កាត់។

លោក Wutthiphong Rattamon ប្រធានបណ្តាញសហករណ៍កសិកម្មខេត្តត្រាតបានមានប្រសាសន៍ថា ផ្លែមង្ឃុតប្រហែល ៥ ម៉ឺនតោនត្រូវបានគេរំពឹងថានឹងត្រូវចែកចាយនៅឆ្នាំនេះ។ លោកបានបន្តថា ការហាមប្រាមរបស់កម្ពុជាលើកសិផលថៃបានធ្វើឲ្យគាត់មានការព្រួយបារម្ភ បើទោះជាទីផ្សារកម្ពុជាមានត្រឹមតែ ៥ ទៅ ១០ ភាគរយនៃការនាំចេញផ្លែមង្ឃុតរបស់ថៃក៏ដោយ។