ភ្នំពេញ៖ ម្ចាស់ជ័យលាភីលេខ២ ប្រចាំកម្មវិធី «ផ្កាយរះក្នុងសួន» លោក ជ័យ សុវ៉ាត បានប្រកាសចេញថតបទថ្មីកាលពីថ្ងៃទី២៧ ខែសីហា ឆ្នាំ២០១៦នេះ នៅក្នុងបរិវេណសាកលវិទ្យាល័យន័រតុន។ និស្សិតសិក្សាផ្នែកសុខាភិបាលប្រមាណ១០០នាក់ នៃសាលានេះក៏បានស្ម័គ្រចិត្ត ចូលរួមសម្ដែងដើម្បីបង្ហាញពីទុក្ខលំបាករបស់ពួកគេក្នុងការសិក្សាលើមុខជំនាញទៅមហាជននិងចង់ឲ្យក្រុមគ្រួសារយល់ពីបញ្ហាប្រឈមនានារបស់ពួកគេដែរ។

លោក ជ័យ សុវ៉ាត និយាយថា បទច្រៀង«ជីវិតនិស្សិតពេទ្យ» គឺជាបទភ្លេងថ្មីដែលជាការនិពន្ធទំនុកច្រៀង និងបទភ្លេងដោយលោកផ្ទាល់ ។ លោកថា បទនេះ គឺជាការនឹកឃើញ ចេះតែច្រៀងលេងៗ ហើយដោយកត់សម្គាល់ថា ចង្វាក់ដែលបានប្រឌិតឡើងអាចធ្វើជាបទភ្លេចល្អ ក៏សម្រេចផលិតជាចម្រៀង ហើយនិពន្ធទំនុកច្រៀងនិយាយពីនិស្សិតពេទ្យឲ្យល្អតែម្ដង។ លោកបន្តថា បទនេះនឹងបញ្ចេញនៅលើ Youtube នៅថ្ងៃទី១៥ កញ្ញា ខាងមុខ ហើយបទនេះដែរ ក៏នឹងក្លាយជាបទដែលលោកគ្រោងលើកយកមកច្រៀង ក្នុងព្រឹត្តិការណ៍កម្រាលព្រំដ៏អស្ចារ្យរបស់សាលាន័រតុននៅថ្ងៃទី១៧ កញ្ញាខាងមុខនោះដែរ។

លោក និយាយថា អត្ថន័យសំខាន់នៃបទចម្រៀងនេះគឺបានរៀបរាប់ពីការលំបាករបស់និស្សិតពេទ្យគ្រប់គ្នា ដែលត្រូវតស៊ូតាំងពីឆ្នាំទី១ រហូតដល់ឆ្នាំទី៨ ទម្រាំអាចបញ្ចប់ការសិក្សាមួយនេះបាន។ លោកថា បទនេះនឹងរំពឹងថា ជោគជ័យ ដោយសារតែភាពជាក់ស្ដែង គឺមនុស្សតិចណាស់បានដឹងពីការលំបាករបស់និស្សិតពេទ្យ និងផ្អែកថា និស្សិតពេទ្យនៅក្នុងប្រទេសកម្ពុជាភាគច្រើនពិតជាគាំទ្របទនេះ។ លោកថា ដោយសារខ្លួនជានិស្សិតពេទ្យឆ្នាំទី៤ស្រាប់ និងបានដឹងពីទុក្ខលំបាកក្នុងការសិក្សាជំនាញនេះ ទើបអាចនិពន្ធបទថ្មី ដែលឆ្លុះបញ្ចាំងពីជីវិតតស៊ូរបស់អ្នកចង់រៀនពេទ្យបាន។ លោកបញ្ជាក់ដែរថា ក្រៅពីការសិក្សាជាមួយនឹងឯកសារមេរៀនដ៏ច្រើន និស្សិតខ្លះក៏ត្រូវឃ្លាតឆ្ងាយពីក្រុមគ្រួសារ។ លោកថា ការសិក្សាជំនាញផ្នែកពេទ្យ ឬវេជ្ជបណ្ឌិតត្រូវការការព្យាយាមខ្លាំងនិងហ្មត់ចត់ព្រោះតែជំនាញនេះគឺត្រូវយកទៅសង្គ្រោះជីវិតមនុស្ស ហើយអ្វីដែលលោកចង់បានមកវិញពីអ្នកទស្សនានិងស្តាប់បទចម្រៀងនេះគឺការយល់ចិត្ត និងផ្តល់តម្លៃមកលើនិស្សិតដែលកំពុងបន្តការសិក្សាលើជំនាញដ៏លំបាកមួយ។ ប៉ុន្តែ អ្វីដែលលោកសប្បាយចិត្តនោះ គឺលោកទទួលការចូលរួមពីនិស្សិតពេទ្យនៅក្នុងសាកលវិទ្យាល័យន័រតុនរហូតដល់១០០នាក់មកចូលសម្ដែងនៅក្នុង MV នេះ។ លោកថា សកម្មភាពដែលលោកចេញថត មិនមែនជាឈុតទាំងស្រុងក្នុងបទ «ជីវិតនិស្សិតពេទ្យ» នោះទេ គឺលុះត្រាតែបទដែលគ្រោងនឹងប្រូម៉ូតនេះទទួលបានការគាំទ្រ ទើបលោកនឹងចុះថត MV ឲ្យពេញលេញម្ដងទៀត ហើយនឹងមានការរៀបចំឲ្យនិស្សិតពេទ្យបន្ថែមទៀតចូលរួមសម្ដែង។

តារាចម្រៀង ជ័យ សុវ៉ាត ស្នើទ្រ ទស្សនិកជនជួយគាំទ្របទចម្រៀងថ្មីនេះដោយសារបទនេះជាស្នាដៃដំបូង ដែលលោកនិពន្ធ និងច្រៀងដោយផ្ទាល់ ហើយលើកឡើងពីជីវិតដ៏កម្សត់របស់និស្សិតពេទ្យភាគច្រើន ដែលតស៊ូទម្រាំបានបញ្ចប់ការសិក្សា៕

ដោយ៖ វឌ្ឍនា